Zgjedhjet presidenciale në Tanzani u shndërruan në kaos total në rrugë dhe hapën një luftë të hapur midis protestuesve dhe forcave të sigurisë në këtë shtet afrikan.
Protestuesit u mblodhën në shumë qytete të vendit për shkak se kandidatët kryesorë opozitarë u përjashtuan nga gara zgjedhore.
Kjo praktikisht i hapi rrugën fitores së presidentes Samia Suluhu Hassan, e cila fitoi 98 për qind të votave.
Komisioni Zgjedhor njoftoi se Hassan mori 97.66 për qind të votave me një pjesëmarrje prej 87 për qind, megjithëse dëshmitarët raportuan pjesëmarrje të ulët dhe parregullsi në vendvotime.
Protestat shpërthyen ditën e zgjedhjeve, të mërkurën, dhe vazhduan deri të premten në mbrëmje, raporton bbc.
John Kitoka, zëdhënës i partisë opozitare Chadema, tha për Agence France-Presse (AFP) se që atëherë janë vrarë qindra njerëz.
“Ndërkohë që flasim, numri i të vdekurve në Dar es Salaam është rreth 350, ndërsa në Mwanzu mbi 200. Kur i shtohen shifrat nga vende të tjera të vendit, totali arrin rreth 700”, tha ai.
Ai shtoi se numri i viktimave mund të jetë shumë më i lartë, pasi vrasjet mund të ndodhin gjatë orës policore të natës, e cila u vendos që nga e mërkura. Përveç liderëve opozitarë të përjashtuar nga gara, janë raportuar edhe raste rrëmbimi të kritikëve të qeverisë aktuale.
Për këtë arsye, qytetarët shkatërruan edhe pronat e bizneseve të lidhura me partinë në pushtet dhe më pas reagoi edhe ushtria.
Shefi i Shtabit të Përgjithshëm të ushtrisë, gjenerali Jacob John Mkunda, dënoi dhunën dhe i quajti protestuesit “kriminelë”. Ai tha se forcat e sigurisë do të përpiqen të kontrollojnë situatën. /Telegrafi/
