Ademi reagon pas banerave nga tifozët e Sparta Pragës, paralajmëron ankesë në UEFA

Presidenti i Federatës së Futbollit të Kosovës, Agim Ademi ka reaguar pas skandalit në Çeki, më saktësisht në ndeshjen e gjigantit çek Sparta Pragë.

Tifozët e Sparta Pragës kanë bërë një skandal të madh, ku duke treguar mbështetjen e tyre për futbollistin serb, Velko Birmancevic, vendosën disa banera me një mbishkrim anti – Kosovë.

Përkundër se te Sparta Pragë luajnë dy reprezentuesit e Kosovës, Albion Rrahmani dhe Ermal Krasniqi si dhe dy të Shqipërisë, Indrit Tuci e Qazim Laçi.

Ademi ka thënë se do t’i adresohet UEFA-s për të bërë ankesë.

Postimi i plotë nga Agim Ademi:

Si president i Federatës së Futbollit të Kosovës, shpreh shqetësimin e thellë për incidentin e fundit në kampionatin çek, i cili prek dhe sfidon identitetin tonë shtetëror dhe është fyes ndaj futbollistëve tanë. Ky veprim është i papranueshëm dhe nuk përkon me frymën e respektit dhe miqësisë që futbolli duhet të promovojë.

Ne besojmë dhe e promovojmë futbollin si një platformë për bashkëjetesë dhe mirëkuptim mes popujve. Prandaj, kërkojmë që çdo provokim i tillë të shmanget në frymën e këtyre vlerave, në mënyrë që futbolli të mbetet shembull i unitetit dhe respektit, pavarësisht dallimeve.

Gjithashtu, u bëj thirrje futbollistëve tanë që përfaqësojnë Kosovën me krenari në klubet e tyre, që të vazhdojnë të mbeten të përkushtuar dhe profesionistë, duke mos u ndikuar nga provokime të tilla, pavarësisht se nga kush vijnë. Ne jemi të vetëdijshëm për sfidat që ata përballojnë dhe i mbështesim me gjithë zemër në çdo hap të karrierës së tyre.

Në këtë frymë, u drejtohem drejtuesve të klubit Sparta Pragë, si dhe mikut tim Petr Fousek, president i federatës çeke, duke u kërkuar që t’i ndalojnë këto provokime dhe të mbrojnë futbollistët shqiptarë, të cilët janë shembull i profesionalizmit dhe angazhimit në fushën e blertë.

Me këtë rast u them Albion Rrahmanit, Ermal Krasniqit, Qazim Laçit dhe Indrit Tucit; Jini krenarë për kombin dhe shtetet që përfaqësoni. Shqipëria dhe Kosova janë faktorë të rëndësishëm në futboll dhe profesionalizmi i juaj do ta bëjë futbollin tonë të jetë primar në Evropë.

Uroj që suksesi t’ju ndjekë gjithmonë, teksa FFK-ja do të qëndrojë gjithmonë pranë jush, me të gjitha kapacitetet dhe mundësitë e veta.
Kosova është një realitet i pakthyeshëm

<>Kjo ankesë do të adresohet edhe në UEFA, në kompeticionet e klubeve, duke kërkuar që të merren masa në ndalimin e veprimeve të tilla. /Telegrafi/