Aksion simbolik i deputetit Haki Abazi – hap “të pame për vdekjen klinike të Kuvendit dhe Qeverisë”

Deputeti i pavarur i Kuvendit të Kosovës, Haki Abazi sot para Kuvendit të Kosovës ka zhvilluar një aksion simbolik duke vendosur mbi një karrige të mbuluar me peshqir “njoftim mortor” për të simbolizuar sipas tij “vdekjen” e Kuvendit dhe të Qeverisë së Kosovës.

Në letrën e vendosur mbi karrige shkruan “Pas ngufatjes tre vjeçare dha shpirt Kuvendi i Republikës së Kosovës! E pikëlluar: Demokracia e Kosovës”.

Gjithashtu sot pasi Qeveria e Kosovës është duke përgatitur një draft-statut lidhur me Asociacionin e Komunave me shumicë serbe, bazuar në propozimin e Fondacionit gjerman Friedrich Ebert, deputeti Haki Abazi ka thënë se kjo është shkelje mbi gjakun e Astrit Deharit.

Abazi theksoi se kjo është shkelje po ashtu edhe mbi gjakun e aktivistëve të cilët kanë rënë mbi idealin që Kosova nuk do të pranojë “Zajednicë” për brenda rendit Kushtetues.

“Kur e pa që Dora Bakoyannis, heroina e Vetëvendosjes nëpërmjet Francës dhe të tjerëve iu vendosi dhe një kusht tjetër të Asociacionit, tani e dërgon statutin e ‘Zajednicës’ në Kushtetuese. Kjo është shkelje mbi gjakun e Astrit Deharit, është shkelje mbi gjakun e të gjithë aktivistëve të cilët kanë rënë me idenë e idealin që Kosova nuk do të pranojë Zajednicë për brenda rendit Kushtetues”, ka thënë Abazi.

Lexo po ashtu Qeveria e Kosovës me draft-statut për Asociacionin frymëzuar nga FES, do ta dorëzojë në Kushtetuese

Ai tha se draft statuti i Friedrich Ebert është jashtëzakonisht i dëmshëm dhe rikonfirmon marrëveshjen 11 pikëshe.

Tutje Abazi tha se njerëz pa legjitimitet kanë vendosur se kur do të bëhet Asociacioni.

“Njerëz pa legjitimitet të cilët nuk e kanë marr votën e qytetarëve, por në kthina të errëta vendosin se kur do të bëhet Asociacioni, se kur duhet të falet toka e manastirit, se kur duhet të hyjë Kosova në negociata e në tensione përderisa me mijëra e qindra njerëz e kanë lënë Kosovën pikërisht për shkak të mungesës së prosperitetit dhe jetës normale në vend”, ka thënë ai.

Është mashtrim total i idesë së zgjedhjeve të parakohshme për ta manipuluar dhe nxjerrë energjinë për të mos u pa ideja që ky është duke e bërë ‘Zajednicën’. E patë sot në mëngjes që është duke e dërguar statutin e draftuar nga Friedrich Ebert që tregon qartazi se në çfarë niveli ka mbërri hipokrizia dhe manipulimi në formën e qeverisje”, ka thënë Abazi. /Telegrafi/