Zjarret në fshatin Belle të Deçanit vazhdojnë të jenë aktive, komuna kërkon ndihmë nga KFOR-i

Njësia e zjarrfikësve në Deçan po përballet me një situatë të vështirë ndërsa përpiqet të ndalojë një zjarr të madh që ka shpërthyer në bjeshkët e fshatit Belle.

Drejtori i Drejtorisë për Mbrojtje, Shpëtim dhe Shërbime Publike, Izet Zenuni, ka bërë të ditur për Telegrafin se zjarri mbetet aktiv dhe po monitorohet nga afër.

“Shqetësuese ka qenë zjarri në Belle në bjeshkët e Belles, i cili zjarr është aktiv ende. Njësiti i zjarrfikësve ka shkuar në vend të ngjarjes dhe përkundër rrezikut që e kanë pasur për jetë pasi që terreni është i keq, kanë arritur ta lokalizojnë dhe e kanë në monitorim”, ka thënë Zenuni.

Ndërkohë, sipas drejtorit Zenuni, ata janë në pritje të ndihmës nga KFOR-i, të cilëve u është kërkuar asistencë me helikopter për të ndihmuar në shuarjen e zjarrit.

“Shpresojmë që nuk do të përhapet më shumë, por ne kemi bërë edhe kërkesë KFOR-it për të na asistuar me helikopter, po deri më tani nuk kemi përgjigje dhe jemi në këtë situatë duke e monitoruar,” ka përfunduar Zenuni.

Zjarrfikësit vazhdojnë të monitorojnë situatën dhe të ndërhyjnë aty ku është e nevojshme, duke synuar të shmangin përhapjen e mëtejshme të zjarrit dhe të mbrojnë jetën e banorëve të zonës.