Urimi i Myftiut Tërnava: Ramazani-muaji i mëshirës

Tërnava uron besimtarët myslimanë për muajin e Ramazanit
5 Qershor 2016 – 12:41

Me rastin e fillimit të muajit të madhërishëm të Ramazanit, Myftiu i Kosovës, Naim Tërnava ka uruar të gjithë besimtarët myslimanë, duke iu dëshiruar agjërim të lehtë.

Në urimin e tij, Tërnava, në emër të Bashkësisë Islame të Kosovës, ka lutur Allahun xh.sh., të pranojë agjërimin dhe adhurimet e tjera, “të cilat i bëjmë në shenjë Madhërimi ndaj Tij”.

“Sinqeriteti dhe besnikëria janë vlera të pastra të cilat rezultojnë nga agjërimi i muajit të Ramazanit, ngase këto janë obligime që dalin nga Kurani, me qëllimin e vetëm që përmes agjërimit të arrijmë kënaqësinë dhe devotshmërinë shpirtërore, duke iu përkushtuar gjatë këtij muaji edhe më shumë besimit që e ndien besimtari në shpirtin dhe zemrën e tij”, ka thënë Tërnava në urimin e tij.

“Mëkatet e mëparshme të mos jenë pengesë e pendimit, e lutjeve edhe gjatë këtij muaji, që jetës ti japim kuptim,që agjërimit ti japim vlerë. Dyert e kësaj feje universale për mbar botën gjithherë janë të hapura dhe mëshira e të Madhit Zot në raport me njeriun gjithherë është prezente”, ka theksuar ai.

Myftiu i Kosovës, Naim Tërnava, më tej ka thënë se Ramazani, ky muaj i mëshirës, po troket në dyert dhe vatrat tona, prej nesër begatitë e këtij muaji do të fillon t’i shijon edhe zemra dhe shpirti i çdo besimtari.

“Të gjithë myslimanët e botës do të sakrifikojnë nga vetja për të agjëruar dhe Madhëruar Allahun edhe më shumë se muajve tjerë,duke u përpjekur të ripërtërijë vlerat më madhore të Ramazanit”, potencon ai.

“Myslimanët e mbarë botës janë të gëzuar për ardhjen e këtij muaji në të cilin nuk marrin fund begatitë e Allahut, të cilat vetëm mund të përjetohen por jo edhe të shpjegohen,ngase ky është muaj i mëshirës,lutjeve,pendesës,adhurimit,muaj i Kuranit,muaj i shpëtimit. Ramazani është mburojë e besimtarit,është thirrje mbi dinjitetin dhe përgjegjësinë e cila forcon marrëdhëniet e njeriut me Zotin, me familjen dhe shoqërinë, të cilat i ngrit gjatë këtij muaji në nivel edhe më të lartë me Zotin Krijues”, ka thënë më tej Tërnava.

“Po hyjmë në muajin e mëshirës, e faljeve, e shpëtimit, muajin ku edhe lutjet drejtuar Zotit pranohen më shumë, muajin e mirësive të panumërta. Ndaj këto të mira – të nderuar Vëllezër e motra – i arrijmë me adhurim, agjërim, lutje drejtuar Zotit, me lexim të Kuranit, me sadaka-ndihmë atyre që kanë nevojë. Agjërimi i muajit të Ramazanit na porositë duke thënë: ”Nuk është koha që të vdesim në rrugën e Zotit,por është koha që të jetojmë në harmoni të plotë me të gjithë njerëzit, e kjo është rruga e Zotit””, shprehet ai.

Më tej, Tërnava thotë se e kemi obligim fetar që në këtë muaj edhe më shumë të ndihmojmë të varfrit, njerëzit në nevojë,duke begatuar sofrat e tyre edhe më shumë gjatë këtij muaji të shenjët.

“Duke bashkuar lutjet tona gjatë këtij muaji si asnjëherë më parë, duke u lutur që të marrin fund luftërat,vrasjet e njerëzve të pafajshëm, që në botë të mbretëroi paqja, harmonia dhe bashkëjetesa mes njerëzve. Larg, vrasjeve, torturave, dhunimeve, larg çdo ekstremizmi, radikalizmi e terrori. Zemrat tona të mbushen me dashuri e mbarësi e jo urrejtje e vrazhdësi. Në këtë mënyrë botën do ta bëjmë më të mirë, më të sigurt, më joshëse për fëmijët tanë, dhe brezat që do të vijnë sepse kështu na mëson Islami”, theksoi Myftiu Tërnava.

“Më lejoni që në fund tua uroi këtë muaj të shenjtë të Ramazanit, të gjithë besimtarëve në Kosovë, dhe brenda trojeve tona etnike shqiptare, por edhe të gjithë vëllezërve dhe motrave në mërgatën tanë kudo që ata gjenden. Zoti na pranoftë agjërimin dhe adhurimet e tjera edhe gjatë këtij muaji të shenjët të Ramazanit”, theksoi myftiu i Kosovës, Naim Tërnava, në urimin e tij drejtuar qytetarëve të Kosovës.