Një nga udhërrëfyesit më të mëdhenj malor tha të enjten se nuk është gati të tërhiqet pasi u ngjit në malin Everest për herë të 28-të.
Sipas mediave të huaja, përcjell Telegrafi, nepalezi Kami Rita arriti majën 8,849 metra të malit më të lartë në botë të martën, duke thyer rekordin e tij më pak se një javë pasi e vendosi atë.
“Unë do të vazhdoj të ngjitem për aq kohë sa trupi im më lejon”, u tha gazetarëve udhërrëfyesi 53-vjeçar pasi mbërriti nga mali në aeroportin e Katmandu, ku iu bë një pritje heroike nga mbështetësit dhe anëtarët e familjes.
Ai tha se qëllimi i tij nuk është të konkurrojë për ndonjë rekord, por të ndihmojë klientët e tij të huaj të ngjiten në mal.
Sezoni i ngjitjeve të këtij viti pothuajse ka përfunduar dhe ngjitja e tij e ardhshme do të duhet të presë për pranverën e ardhshme.
Kami Rita arriti në majën një ditë pasi shoku i tij udhërrëfyes Pasang Dawa arriti rekordin e tij të mëparshëm prej 27 ngjitjesh.
Kami Rita u ngjit për herë të parë në Everest në vitin 1994 dhe e ka bërë këtë pothuajse çdo vit që atëherë.
Ai është një nga shumë udhërrëfyes Sherpa, ekspertiza dhe aftësitë e të cilit janë jetike për sigurinë dhe suksesin e alpinistëve të huaj që kërkojnë të arrijnë majën e malit.
Babai i tij ishte ndër udhëzuesit e parë Sherpa.
Kami Rita ka ngjitur disa nga majat më të larta në botë përveç Everestit, duke përfshirë K2, Cho Oyu, Manaslu dhe Lhotse.
Mijëra njerëz janë ngjitur në malin Everest që kur “u pushtua” për herë të parë nga Edmund Hillary i Zelandës së Re dhe udhëzuesi Sherpa Tenzing Norgay në vitin 1953. Këtë vit është 70-vjetori i ngjitjes së parë. /Telegrafi/