Presidenti i Shteteve të Bashkuara, Donald Trump, ka thënë se do të vizitojë Kinën në fillim të vitit të ardhshëm, pasi ka marrë një ftesë nga Pekini.
"Jam ftuar të shkoj në Kinë dhe do ta bëj këtë diku në fillim të vitit të ardhshëm. E kemi gati", u tha Trump gazetarëve në Shtëpinë e Bardhë të hënën, shkruajnë mediat e huaja, përcjell Telegrafi.
Presidenti amerikan theksoi gjithashtu se priste të takohej në Korenë e Jugut me presidentin e Kinës, Xi Jinping, për të nënshkruar një marrëveshje tregtare "të drejtë" më vonë këtë muaj, pavarësisht një debati të kohëve të fundit mbi tarifat.
Vetëm javën e kaluar, një kthim në një luftë të plotë tregtare dukej i afërt pasi Kina njoftoi kufizime të reja në eksportet e saj të metaleve të rralla dhe Trump kërcënoi të rriste tarifat për mallrat kineze në 100 përqind.
Duke folur të hënën, Trump duket se i la pas konfliktet e fundit mes tyre, duke thënë se të dy vendet duhej të lulëzonin së bashku.
Ai vazhdoi të shprehte besim në marrëdhënien e tij me homologun Xi, duke kundërshtuar një vlerësim të mëparshëm të Pentagonit se Kina po planifikonte të pushtonte Tajvanin në vitin 2027.
Ai nuk pranoi të përgjigjej në një pyetje nëse do të sakrifikonte mbështetjen e SHBA-së për Tajvanin si pjesë e një marrëveshjeje me Xi.
Në qershor, Sekretari i Mbrojtjes i SHBA-së, Pete Hegseth, e kishte quajtur Kinën një "kërcënim për rajonin" në Dialogun Shangri-La të profilit të lartë në Singapor.
Ministria e Punëve të Jashtme e Kinës iu kundërpërgjigj: "SHBA-të nuk duhet të ushqejnë iluzione për përdorimin e çështjes së Tajvanit si një monedhë negociuese për të përmbajtur Kinën, as nuk duhet të luajnë me zjarrin". /Telegrafi/
