T’i mbështesim gratë në agrobiznes – Thirrje nga EcoKosWomen

Vetëdijësimi për përfshirjen gjinore dhe sociale, ishte qëllimi i evntit organizuar nga Eco KosWomen sot në qytetin e Prishtinës.

Eventi është në kuadër të projektit EREA, i cili mbështetet nga Caritas-i Zviceran në Kosovë dhe financohet nga Bashkëpunimi Austriak për Zhvillim.

Në këtë event janë shpalosur mesazhe që kanë për qëllim vetëdijesimin për rolin e grave në shoqëri, duke nxitur ndryshime pozitive që kontribuojnë në fuqizimin ekonomik të grave, dhe njëkohësisht avancojnë barazinë gjinore në Kosovë.

Fushata ka për qëllim të theksojë rolin e rëndësishëm të grave në zhvillimin e shoqërisë, duke përçuar mesazhe të fuqishme si: “Një grua e fuqishme mbështet një grua tjetër” dhe “Barazia dhe gjithëpërfshirja janë çelësi i suksesit”.

Këto mesazhe do të shfaqen nëpër komuna të ndryshme të Kosovës, duke përfshirë kryeqytetin, si një thirrje për veprim ndaj të gjithë aktorëve të shoqërisë.

Eventi ka vendosur si temë qendrore fuqizimin ekonomik të grave dhe promovimin e rolit të tyre në bujqësi dhe vendimmarrje. Aktivitetet përfshijnë ndërgjegjësimin për rëndësinë e qasjes së grave në burime si grantet për zhvillimin bujqësor dhe përmirësimet infrastrukturore që lehtësojnë transportin për gratë në zonat rurale.

Shpresa Gosalci, nga EKW në fjalimin hyrës tha mesazhet e shpalosura përmes kësaj iniciative janë një thirrje për veprim duke nënvizuar se mbështetja e barazisë gjinore është një faktor kyç në ndërtimin e një të ardhme më të drejtë dhe të sigurt për të gjithë.

“Gratë kudo që janë meritojnë mundësi të barabarta. Mesazhet që shpalosim përmesa tabelave tona në këtë event në Prishtinë por edhe në qytete tjera, janë një thirrje për veprim. Temat kyqe që po promovojmë përmes kësaj iniciative, fuqizimi i grave në bujqësi dhe roli i tyre në vendimmarrje.”, u shpreh ajo.

Venera Çerkini, nga MPBZHHR tha se gratë kanë kontribuar ndjeshëm në zhvillimin e vendit tonë.

“Gratë në Kosovë kanë treguar përherë gatishmëri për t’u përballur me sfida dhe për të luajur një rol të rëndësishëm në fushën e jetës duke kontribuar në mënyrë të ndjeshme në zhvillimin e vendit tonë”, u shpreh ajo.

Ndërkaq Gerhard Schaumberg, drejtor i Caritasit në Kosovë mendon se problemi tek bujqësia është tek informaliteti.

“Mendoj se tashmë ata tashmë po bëjnë një punë të shkëlqyer. Problemi tek bujqësia është kryesisht tek informaliteti. Pra, ajo që ne po mbështesim është gjithashtu të zyrtarizojmë bizneset.”

Havushe Bunjaku, pronare e biznesit 99 Lule, merret me bimë mjekuese aromaatike dhe përveqëse është pjesë e tregut vendor, ajo eksporton edhe në tregun zviceran.

“Na jemi prej komunës së Prishtinës, biznesi është në Slivovë. Biznesi është i funksionalizuar dhe i regjistruar nga viti 2012. Merremi me bimë mjekuese aromatike, kryesisht është i fushës së Bujqësisë, që i përpunojmë pastaj në çajra dhe vajra. Kërkesa është në rritje, sepse prej 2012 deri në 2024 dmth 12 vite jemi veq në tregun vendor dhe pak eksportojmë për tregun zviceran.”, tha ajo.

Valdete Sahiti, pronare e biznesit LoEl, tha për Telegrafin se qytetarët ende nuk janë të vetëdijësuar se çfarë rëndësie kanë produktet vendore.

“Për biznesin, kam përkrahje në të gjitha anët mirëpo duke e pasur parasysh përkrahjen prej organizatave që në përgjithësi udhëhiqen nga gratë atëherë përkrahja ka qenë më e madhe. Ka qenë një motivim, një shtytje më e madhe, nga ana e grave, në anën morale më së pari, që të kanë mbështetur në atë mënyrën “ti mund t’ia dalësh, ti e bën”, kjo ka ardhur nga gratë si shtyje më e madhe. Mirëpo me i’a dalë për produktet vendore, thuajse populli ka nevojë ende të vetëdijësohet se ende te produket e importuara po luan rol edhe çmimi mirëpo ende nuk janë të vetëdijësuar se çfarë rëndësie kanë produktet vendore.”, u shpreh Sahiti.

Organizatorët kanë bërë thirrje për të bashkuar forcat për të krijuar një Kosovë më të fuqishme dhe më të drejtë, duke ndërtuar ura të bashkëpunimit ndërmjet komuniteteve dhe institucioneve për të përkrahur gratë në çdo aspekt të jetës.

Fushata është pjesë e përpjekjeve të vazhdueshme për të rritur ndërgjegjësimin rreth rëndësisë së diversitetit dhe përfshirjes sociale, si dhe për të krijuar mundësi konkrete për gratë që të zhvillojnë potencialin e tyre dhe të kontribuojnë në shoqëri.

Eventi është pritur pozitivisht nga komuniteti dhe institucione të ndryshme, të cilët kanë premtuar mbështetjen e tyre për nismat që fuqizojnë rolin e grave në shoqëri.

Maketa si në Prishtinë me mesazhe vetëdijesuese do të shpërndahen edhe në qytetet tjera të Kosovës si: Peja, Prizreni, Podujeva, Mitrovica, Shtërpca dhe Ferizaj.