Pegatron i Tajvanit, një furnizues i rëndësishëm për Apple dhe Dell tha të hënën se tarifat e presidentit Donald Trump po “hutonin” klientët amerikanë.
Madje, sipas tij, ato rrezikonin të çonin edhe në mungesa të pajisjeve elektronike të konsumit në Shtetet e Bashkuara, përcjell Telegrafi.
Siç vlerëson kryetari i prodhuesit të elektronikës T.H. Tung, tarifat e Uashingtonit përsëri dhe përsëri kanë krijuar pasiguri për shitësit me pakicë në SHBA dhe kanë ndërprerë vendimet për dërgesat.
"Brenda dy muajsh, raftet në Shtetet e Bashkuara... mund të ngjajnë me ato në vendet e botës së tretë, ku njerëzit vizitojnë dyqanet dhe tregjet vetëm për të gjetur rafte bosh, të gjitha sepse të gjithë presin dhe shohin", ka paralajmëruar më tej Tung.
Këtë muaj, Trump ndërpreu papritmas disa tarifa që synonin partnerët tregtarë, përfshirë Vietnamin, Indonezinë dhe Indinë, ku Pegatron ka baza prodhuese.
Megjithatë, një taksë prej 10% për pothuajse të gjitha mallrat e importuara në SHBA mbetet.
Pegatron ka diversifikuar vendet e saj të prodhimit larg Kinës që nga mandati i parë i Trump, duke u zgjeruar në vendet në Azinë Juglindore si dhe në Meksikë. /Telegrafi/
