Skena prekëse: Momenti kur pengjet izraelite dhe palestineze ribashkohen me familjet e tyre pasi kaluan vite në robëri

Izraeli Yarden Bibas përqafoi prindërit dhe motrën e tij për herë të parë pasi kaloi 15 muaj në robëri në Gaza.

I paqartë është fati i gruas dhe dy fëmijëve të tij të vegjël, të cilët janë marrë peng.

Hamasi më parë pretendoi se ata vdiqën në një sulm ajror izraelit.

“Yarden është një baba që la dhomën e tij të sigurt për të mbrojtur familjen, i mbijetoi me guxim robërisë dhe u kthye në realitet”, tha familja e tij në një deklaratë.

Bëhet e ditur se Izraeli mirëpriti lirimin e sotëm të pengjeve nga Hamasi, i cili pason një numër të tjerëve që u liruan të enjten.

Në këmbim, 183 të burgosur palestinezë u liruan nga burgjet izraelite, shkruan skynews, përcjell Telegrafi.

Lexo po ashtu Hamasi liron tre izraelitë - pengjeve u dorëzojnë certifikata dhe dhurata

Izraelitët Ofer Kalderon dhe Yarden Bibas ishin dy të parët e liruar nga Hamasi në paraburgimin e Kryqit të Kuq në Khan Younis këtë mëngjes dhe më vonë iu dorëzuan forcave izraelite.

Amerikano-izraeliti Keith Samuel Siegel u lirua veçmas, pak kohë pas dy të parëve.

Në këmbim, 183 të burgosur palestinezë, disa prej të cilëve kanë vuajtur dënimin e përjetshëm në Izrael, u liruan.

Lirohen të burgosurit palestinezë

Kishte skena festimi në Beitunia në Bregun Perëndimor kur i pari nga këta të arrestuar zbriti nga një autobus pasi u lirua nga Izraeli.

Në mesin e të burgosurve të liruar të shtunën ishte Sidqi Hamed al Zaro, 63 vjeç.

Agjencia Palestineze e Lajmeve raportoi se Zaro, babai i 18 fëmijëve, ka qenë në burgjet izraelite për 24 vjet.

Një i burgosur tjetër i liruar ishte Imad Abu Ramouz, 50 vjeç, nga Hebroni, i cili u dënua me 25 vjet burg, nga të cilat vuajti 21.

Bëhet e ditur se në fazën e parë në vazhdim të armëpushimit, Hamasi po kthen 33 pengje gjatë gjashtë javëve.

Në këmbim, Izraeli po liron 737 të burgosur palestinezë.

Lexo po ashtu Izraeli liron të burgosurit palestinezë

Familja e Ofer Kalderon tha se janë të gëzuar që pas 484 ditëve presin lirimin e tij.

“Sot, më në fund përqafojmë Oferin, duke parë dhe kuptuar me të vërtetë se ai është këtu me ne. Ne kemi qenë dëshmitarë se si ai i mbijetoi këtij ferri”, tha familja e tij.

Edhe familja e Keith Siegel mezi pritnin lirimin e familjarit të tyre.

“Më në fund, pas 484 ditësh e netësh të gjata, të tmerrshme, plot shqetësime të pafundme për babanë tonë, ne mund të marrim frymë sërish”, thanë ata.

“Faleminderit president Trump, që na e ktheve babanë tonë”, shton deklarata.

Ndryshe, pati një moment emocionues kur Yarden Bibas, gruaja dhe dy fëmijët e vegjël të të cilit nuk janë kthyer ende nga robëria mes frikës për mirëqenien e tyre, u ribashkua me prindërit dhe motrën e tij.

Zyra e kryeministrit Benjamin Netanyahu tha: “Qeveria, së bashku me të gjitha agjencitë e sigurisë, do t’i shoqërojë ata dhe familjet e tyre”.

Sot janë parë gjithashtu palestinezët e parë të lejuar të kalojnë në Rafah.

Vendkalimi në kufirin Gaza-Egjipt pritet të hapet fillimisht për 50 militantë të plagosur dhe 50 civilë.

Gjithashtu Egjipti, Jordania, Arabia Saudite, Katari, Emiratet e Bashkuara Arabe, Autoriteti Palestinez dhe Liga Arabe lëshuan një deklaratë të përbashkët duke hedhur poshtë nocionin e transferimit të palestinezëve jashtë tokës së tyre në çdo rrethanë.

Duket se kjo deklaratë i referohet komenteve të fundit nga Donald Trump që sugjeronin se banorët e Gazës duhet të zhvendosen në vende të tjera. /Telegrafi/