Lindja, qoftë natyrale, vagjinale apo me seksion cezarian, përbën një lodhje të madhe për trupin. Megjithatë, trupi ynë është i përgatitur në mënyrë të përkryer për këto sfida
Mitra, muskujt, ligamentet dhe hormonet punojnë së bashku dhe në mënyrë të sinkronizuar për ta sjellë foshnjën në jetë, dhe më pas për t’u rikuperuar natyrshëm në mënyrë që nëna të mund ta ushqejë dhe kujdeset për të.
Megjithatë, shpejtësia e rikuperimit ndryshon dukshëm në varësi të llojit të lindjes. Seksioni cezarian, edhe pse është një mënyrë lindjeje pa dhimbje, më komode dhe më e shpejtë, në vetvete është një operacion i rëndësishëm dhe kërkon më shumë kohë rikuperimi sesa lindja natyrale (vagjinale).
Rikuperimi pas prerjes cezariane, hap pas hapi
Koha e rikuperimit pas prerjes cezariane ndryshon nga një grua te tjetra, por tek shumica e grave trupi rikuperohet plotësisht brenda 4-8 javëve. Disa gra mund të ndiejnë shqetësime ose dhimbje në zonën e plagës edhe pas një viti. Në raste të caktuara, ndjesia e mpirjes në këtë zonë mund të zgjasë edhe më gjatë.
Në vijim përshkruajmë procesin e rikuperimit tek shumica e grave, duke filluar nga orët e para pas operacionit e më tej, transmeton Telegrafi.
Ora e parë pas prerjes cezariane
Nëse keni lindur me seksion cezarian nën anestezi spinale ose epidurale, menjëherë pas operacionit ka shumë gjasë të ndiheni të dobëta dhe të rraskapitura. Mund të përjetoni (por jo domosdoshmërisht) këto simptoma:
• Dhimbje koke
• Të përziera dhe të vjella
• Tension të ulët të gjakut
• Mpirje apo ndjesi pickimi
• Dhimbje në shpinë
Pjesa e trupit nga beli e poshtë do të jetë plotësisht e mpirë, ndaj nuk do të mund t’i lëvizni këmbët. Zakonisht duhen disa orë derisa ndjesia të fillojë të rikthehet.
Nëse keni qenë nën anestezi të përgjithshme, zgjimi mund të zgjasë pak më shumë. Gjatë zgjimit mund të ndiheni të përgjumura, të turbullta dhe të hutuar. Disa gra përjetojnë edhe të përziera ose ndjenjë frike. Fatmirësisht, këto shqetësime kalojnë shpejt sapo efekti i anestezisë largohet.
Ditët e para pas prerjes cezariane
Pas emocionit të madh të takimit me beben për herë të parë, do të kuptoni sa të lodhura dhe të rraskapitura jeni.
Qëndrimi në maternitet pas seksionit cezarian zgjat zakonisht 3 deri në 4 ditë, ndaj shfrytëzojeni këtë kohë për pushim, lidhje me beben dhe për të marrë ndihmën e duhur profesionale.
Stafi mjekësor do të kujdeset që të mos shfaqet infeksion në zonën e prerjes kirurgjikale.
Do të kontrollohet gjithashtu edhe gjakderdhja vagjinale, sepse mitra duhet të pastrojë mbetjet e shtatzënisë. Gjakderdhja është më e fortë në ditët e para dhe në përgjithësi zgjat 4-6 javë pas lindjes.
Dhimbjet pas prerjes cezariane
Sapo efekti i medikamenteve të largohet, mund të filloni të ndieni dhimbje. Edhe pse kontraksionet e forta të lindjes kanë përfunduar, mitra vazhdon të tkurret për t’u kthyer në madhësinë fillestare dhe për të parandaluar gjakderdhjen e tepërt. Krahas këtyre dhimbjeve pas lindjes, do të ndjeni edhe dhimbje në plagën e operacionit.
Rreth 18 orë pas operacionit, dhimbjet arrijnë kulmin pasi efektet e anestezisë dhe barnave qetësuese zhduken plotësisht.
Gjatë ditës së parë ose të dytë, kur dhimbjet janë më të forta, do të merrni medikamente kundër dhimbjes përmes infuzionit ose kateterit spinal/epidural. Kjo do të jetë e mjaftueshme që të ndiheni më komode gjatë pushimit, të flini dhe të kujdeseni për beben.
Që ditën e tretë do të vini re një zbutje të madhe të dhimbjeve, ndaj zakonisht mjaftojnë tabletat kundër dhimbjes. Këto do t’i përdorni sipas nevojës edhe në shtëpi.
Gazrat
Operacioni abdominal shkakton që zorrët të “ngadalësohen” përkohësisht. Për këtë arsye, pas operacionit do t’ju pyesin shpesh nëse keni nxjerrë gazra. Mund të duket e pakëndshme të flisni për këtë, por lëshimi i gazrave është shenjë e mirë, tregon se funksioni i zorrëve po rikthehet në normalitet.
Dhimbjet nga gazrat mund të jenë mjaft të sikletshme, por zakonisht kalojnë brenda disa ditësh, sapo zorrët të rifillojnë punën normale. Deri atëherë, sipas nevojës do të merrni ilaçe kundër gazrave dhe zbutës të feçes. Lëvizja dhe ecja e lehtë do të ndihmojnë shumë në përshpejtimin e rikuperimit. /Telegrafi/
