Shtatë të akuzuarve për terrorizëm u vërtetohet dënimi

Gjykata e Apelit e Kosovës i ka refuzuar ankesat e Prokurorisë Speciale, të akuzuarit Z.Q. dhe ankesat e mbrojtësve të të akuzuarve Z.Q., I.B., S.T., B.B., J.K., L.K. dhe I.K, duke vërtetuar aktgjykimin e Gjykatës Themelore në Ferizaj, sipas së cilit të akuzuarit janë fajtor për rekrutim dhe pjesëmarrje në grup terrorist.

Sipas vendimit të themelores në Ferizaj të datës 20.05.2016, është vërtetuar se shtatë të akuzuarit janë gjetur fajtor për një serë veprash penale si: rekrutimi për terrorizëm në bashkëkryerje nga neni 139  lidhur me nenin 31 të Kodit Penal të Republikës së Kosovës, organizimi dhe pjesëmarrja në grup terrorist në bashkëkryerje, nga neni 143, lidhur me nenin 31 të këtij kodi , nxitja e urrejtjes, përçarjes ose mos durimit kombëtar, racor, fetar ose etnik, nga neni 147 (Z.Q. ), si dhe mbajtja në kontroll, posedim të pa autorizuar të armëve, nga neni 374 (I.B.).

“Gjykata e shkallës së parë e ka dënuar  Z.Q. me 10 vjet burgim, I.B. me 8, S.T. me 7 vjet e 6 muaj, B.B. me 4 vjet e 6 muaj, J.K. me 4, L.K. me 3 dhe I.K me 5. Kolegji penal i Departamentit të Krimeve të Rënda i  kësaj gjykate, gjeti se  pretendimet e prokurorisë, se dënimet e shqiptuara të akuzuarve janë të buta dhe pretendimet e mbrojtësve të akuzuarve, se dënimet e shqiptuara të akuzuarve janë të ashpra, janë  të pabazuara, sepse nga gjykata e shkallës së parë, realisht janë vlerësuar si rrethanat lehtësuese, roli i të akuzuarve dhe kontributi i tyre në kryerjen e veprave penale, për të cilat janë shpallur fajtor. Po ashtu janë refuzuar si të bazuar edhe pretendimet tjera të avokatëve”, thuhet në komunikatën e Apelit.