Shqipëria kushton sa gjysma e Pogbas

Paratë në futboll nuk janë gjithçka, por të ndihmojnë për të ecur përpara.

Ky nuk është rasti për Shqipërinë, e cila për herë të parë arriti të siguronte pjesëmarrjen e saj në një kompeticion evropian. Në specialen e gazetës italiane “Gazzetta Dello Sport”, Kombëtares shqiptare i është kushtuar një hapësirë e veçantë pikërisht për këtë fakt.

Gianni de Biasi arriti të kualifikonte për në Evropian një skuadër, e cila vlen 44.2 milionë euro dhe do të përballet me ekipe që vlejnë miliona euro. Vetëm Paul Pogba vlen sa dyfishi i kuqezinjve, por kjo nuk do të thotë asgjë, sepse në dy ndeshjet miqësore të luajtura mes Shqipërisë dhe Francës, këta të fundit nuk arritën të fitonin asnjë prej tyre.

Shpirti, sakrifica, zemra dhe puna e palodhur në fushën e lojës nga lojtarët kuqezinj zhvlerësuan në 180 minuta klasin, potencialin dhe “grisën” milionat e Francës dhe shumë kombëtareve të tjera që kishin në grup.

Vlera e lojtarëve

Lojtari më i kushtueshëm në radhët e Kombëtares shqiptare është mbrojtësi i Napolit, Elseid Hysaj. Nga faqja e specializuar për vlerat e kartonëve të futbollistëve, “transfermarkt”, Hysaj vlerësohet 9 milionë euro.

Megjithatë, presidenti i napolitanëve nuk ka ndër mend ta largojë për një shifër të tillë. Ai kërkon 20 milionë euro për ta lënë futbollistin shkodran të transferohet në skuadrat që kanë shfaqur interes për të.

Në treshen e lojtarëve më të kushtueshëm të Shqipërisë renditen Etrit Berisha dhe Taulant Xhaka, përkatësisht me nga 4 milionë euro. Pas tyre, Kaçe vlerësohet me 3 milionë euro dhe Gashi me 2.75 milionë.

Lojtari me vlerën e kartonit më të ulët në Kombëtaren shqiptare është Ansi Agolli me 300 mijë euro.

“Ne jemi një skuadër që i dimë limitet tona dhe punojmë gjithmonë për të bërë më shumë sesa mundemi. Do kërkojmë t’u hapim punë të gjithë rivalëve”, thotë gjithmonë De Biasi në konferencat për shtyp. Duket qartazi. Kjo është kryefjala me të cilën ai dërgoi në Evropian ekipin që vlen sa gjysma e kartonit të Paul Pogbas.

Vlera e kartonëve të lojtarëve të Kombëtares
Lojtari      Vlera
PORTIER
Etrit Berisha 4mln €
MBROJTËS
Elseid Hysaj 9 mln €
Lorik Cana 1 mln €
Mërgim Mavraj 1.6 mln €
Ansi Agolli 300 mijë €
Frederic Veseli 800 mijë €
Arlind Ajeti 1 mln €
Berat Gjimshiti 1 mln €
Naser Aliji 700 mijë €
MESFUSHORË
Burim Kukeli 500 mijë €
Taulant Xhaka 4 mln €
Ledian Memushaj 1.4 mln €
Amir Abrashi 2.25 mln €
Migjen Basha 800 mijë €
Ergys Kaçe 3 mln €
Andi Lila 700 mijë €
Ermir Lenjani 1 mln €
SULMUES
Shkëlzen Gashi 2.75 mln €
Odise Roshi 450 mijë €
Milot Rashica 2 mln €
Sokol Cikalleshi 2.3 mln €
Armando Sadiku 750 mijë €
Bekim Balaj 2 mln €
Rei Manaj 1 mln €
(Tabelë e publikuar në “Gazzetta Dello Sport”)