Shoqata e Hotelierisë dhe Turizmit Pro in reagon pas vendimeve të fundit ku përfshihet organizimi i dasmave

Shoqata e Hotelierisë dhe Turizmit Pro in, ka reaguar pas vendimit në detyrë të ministrit të Shëndetësisë, Arben Vitia, se këtë vit nuk do të ketë organizim të dasmave dhe se martesat do të bëhen pa tubime të njerëzve.

Përfaqësuesi i kësaj shoqate, Visar Demolli tha për Telegrafin se ky vendim do t’i dëmtojë shumë.

“Dëmet janë të mëdha si në restaurante, punëtorë hotelieri, këngëtar, orkestra të ndryshme muzikore, kameraman e fotograf, prodhuesit vendor të pijeve dhe ushqimit. Taksat do të jenë minus për shtetin dhe ndikimi i mërgatës pasi që ata janë të cilët e mbushin vende me para etj”, deklaroi ai.

Lexo po ashtu Vitia: Këtë vit nuk do të ketë dasma e ahengje familjare

Po ashtu kjo shoqatë bën thirrje që të reagohet ndaj vendimit, pasi që qindra familje varen nga puna e tyre në hotele.

“Ky zinxhir i madh cili në gjirin e vet përben një armatë të tërë profesionistesh në fusha të ndryshme po mbesin pa punë. Pastaj e gjithë kjo do të sjell pasoja të paparashikueshme financiare thjeshtë po na leni pa kafshatën tonë të gojës. Është kërkesa e jona që të bashkangjiteni të gjithë ata që kanë lidhje me ne për një reagim të fuqishëm ose edhe me një peticion ku do të përfshihen të gjithë akterët që janë pjesë e jona apo anasjelltas. Të gjitha këto kategori apo lloje biznese që kanë lidhshmëri me ne janë pagues të shtetit tonë. Janë me qindra e mijëra familje që varen kryesisht nga ato që fitojnë nga puna e tyre e ushqejnë familjet”.

Ndryshe, dje ministri Vitia ka pohuar se viti 2020 do të jetë vit i distancës dhe se nuk do të ketë tubime të njerëzve, as në dasma e as në ceremoni mortore./Telegrafi/