Ruskoska: PSP duhet të jetë njësi e veçantë në Prokurorinë Publike

Kryetarja e Prokurorisë për krim të organizuar dhe korrupsion, Vilma Ruskoska vlerëson se Prokuroria Speciale Publike duhet të përfshihet si njësi e veçantë në Prokurorinë Publike, përcjell Telegrafi Maqedoni.

Ruskoska thotë se vendimi i fundit i Gjykatës së Lartë lidhur me PSP-në, është joligjore.

“Ajo çka ka bërë është joligjore. Gjykata e Lartë sipas afatit përcaktues nuk ka të drejtë ligjor të interpretojë ligj ose nen të ligjit. Sipas legjislacionit aktual për këtë është kompetente Komisioni ligjvënës në Kuvend. Gjykata e Lartë mund të merr qëndrim të përgjithshëm vetëm nëse ka zbatim të ndryshëm të një ligji, si për shembull gjykatat të interpretojnë ndryshe një ligj, atëherë Gjykata e Lartë duhet të marrë qëndrim të përgjithshëm se si duhet të procedohet”, deklaroi Ruskoska në emisionin “Peçat na nedela” në “1Tv”.

Për atë nëse “bombat” që do të dërgohen në Gjykatën e Lartë do të llogariten si të pavlefshme, Ruskoska tha se sipas hapave të fundit nga Gjykata e Lartë, nuk do të ishte habitur nëse do të bënin këtë.

“Qëndrimi i Komisionit të Venedikut është se ata mund të përdoren si dëshmi materiale. Do të ishte mjaftë e keqe si për PSP-në si për shtetin nëse ato paraqiten si të pavlefshme”, tha Ruskoska, duke shtuar se edhe pse inçizimet janë marr në mënyrë jolegale, ato duhet të shfrytëzohen si dëshmi, sepse janë në interes të hetimeve./Telegrafi/