Rreth 9,000 njerëz po vdesin çdo ditë nga COVID-19 në Kinë, thotë një firmë kërkimore britanike

Rreth 9,000 njerëz në Kinë ndoshta po vdesin çdo ditë nga COVID-19, tha të enjten firma e të dhënave shëndetësore me bazë në Mbretërinë e Bashkuar Airfinity.

Sipas mediave të huaja, përcjell Telegrafi, vlerësimi vjen pasi infeksionet shpërthyen në vendin më të populluar në botë.

Infeksionet me COVID-19 filluan të përhapen në të gjithë Kinën në nëntor, duke rritur ritmin këtë muaj pasi Pekini “çmontoi” politikat e tij zero-COVID, përfshirë testimin e rregullt PCR mbi popullsinë e tij dhe publikimin e të dhënave për rastet asimptomatike.

Vdekjet kumulative në Kinë që nga 1 dhjetori ka të ngjarë të kenë arritur në 100,000 me infeksione që arrijnë në 18.6 milionë, tha Airfinity në një deklaratë.

Firma e të dhënave thotë se përdor modelim bazuar në të dhënat nga provincat kineze përpara se të zbatoheshin ndryshimet e fundit në rastet e raportimit.

Airfinity pret që infeksionet me COVID-19 në Kinë të arrijnë kulmin e tyre të parë më 13 janar me 3.7 milionë raste në ditë.

Veç kësaj, Airfinity pret që vdekjet të arrijnë kulmin më 23 janar rreth 25,000 në ditë, me vdekjet kumulative që arrijnë në 584,000 që nga dhjetori.

Që nga 7 dhjetori kur Kina bëri një kthesë të papritur të politikës së saj, autoritetet kanë raportuar 10 vdekje nga COVID-19. /Telegrafi/