Rënia e kulmit nga ndërtesa e Komunës së Prishtinës ku u lëndua një 23 vjeçare, ekspertët: Nuk ishte i ndërtuar sipas standardeve

Një 23 vjeçare nga Prishtina ditë më parë ka pësuar lëndime të rënda trupore si pasojë e rrëzimit të kulimit të ndërtesës së Komunës së Prishtinës.

Lidhur me këtë ngjarje kryetari i Prishtinës, Përparim Rama në një konferencë për media bëri të ditur se lidhur me këtë rast ai ka kërkuar që të bëhet një vlerësim preliminar.

“Unë kam qenë jashtë vendit kur kam marrë informatën për këtë aksident, dhe e kam parë të rëndësishme të marrë një vlerësim preliminar rreth arsyes se pse ka ndodhë ky aksident që për fat të keq ka lënduar një qytetare të Prishtinës e cila gjendet në QKUK”, tha Rama.

Ai shtoi se gjendja e qytetares së lënduar është stabile por ende në rrezikshmëri të lartë.

“Jemi në kontakt çdo ditë me mjekët edhe familjen e pacientes dhe urojmë dhe shpresojmë që shëndeti i saj të përmirësohet. Për këtë arsye kur kam dëgjuar se problemi me kulm ka qenë edhe më parë, ka ndodhur në vitin 2017, kam kërkuar të bëhet një ekspertizë urgjente për të ditur se çfarë ka shkaktuar këtë problem dhe kam ftuar ekspertët e fushës Visar Gecin dhe Gëzim Kastratin, të cilët veprojnë jashtë komunës së Prishtinës për të bërë këtë vlerësim preliminar”, tha Rama.

Arkitekti Visar Geci tha se për të bërë këtë vlerësim preliminar ata janë konsultuar edhe me dy inxhinier të ndërtimtarisë, derisa shtoi se klumi i ndërtesës së Komunës së Prishtinës nuk ka qenë i ndërtuar sipas standardeve.

“Struktura në të cilën është ndërtuar kulmi nuk është në bazë të standardeve. Kulmi përgjatë perimetrit të tij ka pasur strehë. Si pasojë e erërave, presioni i krijuar nën strehën e kulmit e ka nda konstruksionin e kulmit nga muri vertikal ku kulmi ka peshuar. Pas pamjeve dhe hulumtimeve në teren kemi hasur në shumë parregullsi të ekzekutimit të punimeve në konstruksionin e kulmit”, tha Geci.

Ai gjithashtu tha se karrigat e kulmit janë të ndërtuara jashtë standardeve dhe nga materiali i dobët.

“Mungonte ANKERIMI adekuat me fileta dhe profile metalike si dhe lidhjet e drurit sipas normave. Nga hulumtimi në teren shihet qartë se nuk është ekzekutuar asnjë ankerim i brinakeve por ato vetëm mbështeten mbi murin e jashtëm. Kjo është arsyeja kryesore pse erërat disa herë kanë dëmtuar këtë kulm”, tha Geci.

Geci i cilësoi punimet për renovimin e këtij kulmi si “shkel e shko”. /Telegrafi/