RDK: Fillon vetizolimi i Maqedonisë

Rilindja Demokratike Kombëtare ka reaguar në lidhje me sanksionin e parë nga Komisioni Evropian për Maqedoninë. RDK në reagimin drejtuar Telegrafit në Maqedoni thotë se ky hap është vetëizolim për Maqedoninë.

”Paralajmërimet e fundit për sanksione ndaj Maqedonisë duke i suspenduar 27.1 milion euro nga IPA fondet, me gjasë reale për suspendime tjerra prej 50 milion euro të IPA fondeve, si dhe suspendimin e korridorit 8, janë indikacione reale për një izolim të tmerrshëm ndaj regjimit të këtij vendi. Rilindja Demokratike Kombëtare mban qëndrim konsistent se qytetarët e këtij vendi nuk duhet dënuar përshkak të sjelljeve të papërgjegjëshme të politikanëve. Që nga pavarsimi i vendit e deri më sot, komuniteti ndërkombëtarë ka investuar me miliarda euro për zhvillimin, mirëqenien, demokracinë, drejtësinë, dhe stabilitetin e këtij vendi, dhe ky komunitet ka të drejtë absolute të kërkojë llogari direkte nga këta politikan, pa mos u dënuar qytetarët e rëndomtë të këtij vendi. Kujdesi ndaj parave të taksapaguesve të huaj nuk është asnjë shkelje sovraniteti ndaj shtetit, por kërkim llogari direkte nga keqpërdoruesit e këtyre fondeve. Toleranca ndaj këtyre politikanëve të papërgjegjshëm duhet të përfundoj sa më shpejtë me qëllim që çmimin e sjelljes së tyre mos e paguajn qytetarët e rëndomtë. Ata nuk duhet të përdoren mish për top. Qytetarët e këtij vendi nuk meritojnë të dënohen për sjelljet e papërgjegjëshme të këtij pushteti.” shkruhet në reagimin e RDK-së së Vesel Memedit./Telegrafi/