Putin: Shpresoj në një normalizim të plotë të marrëdhënieve me Japoninë

Presidenti rus, Vladimir Putin theksoi sot se shpreson në normalizimin e plotë të marrëdhënieve ruso-japoneze duke e cilësuar si anakronizëm mungesën e një traktati paqeje mes Moskës dhe Tokios, 70 vjet pas fundit të Luftës së Dytë Botërore.

“Ne kërkojmë normalizimin e plotë të marrëdhënieve”, deklaroi Putin, në një intervistë të dhënë për stacionin televiziv japonez “Nippon” dhe për gazetën japoneze “Yomiuri”, publikuar në faqen e internetit të Kremlinit dy ditë para vizitës së drejtuesit rus në Japoni.

“Mungesa e traktatit të paqes mes Rusisë dhe Japonisë është një anakronizëm i të shkuarës dhe ky anakronizëm duhet të zhduket”, nënvizoi ai duke pranuar se bëhej fjalë për një detyrë të vështirë.

Vladimir Putin, i cili do të zhvillojë të enjten një vizitë në Japoni, do të pritet nga kryeministri japonez, Shinzo Abe në Nagato, qytet i të parëve të tij në prefekturën e Yamaguchit, para se të shkojë në Tokio për negociata të përqendruara kryesisht në ekonomi.

Sipas presidentit rus ”atmosfera në provincën e shtrenjtë të kryeministrit japonez do të jetë e favorshme për një bisedë të sinqertë (…) që do të ketë rezultate, veçanërisht për sa i përket zgjidhjes së mosmarrëveshjeve territoriale”. /kp/