Profesori nga Parisi, Nezir Kraki i bashkohet partisë GUXO, do të garojë për deputet

Bashkëkryetarja e partisë Guxo, Donika Gërvalla, ka njoftuar se profesori nga Parisi Nezir Kraki, i është bashkuar kësaj partie për zgjedhjet e 9 shkurtit.

Përmes një shkrimi në Facebook, Gërvalla theksoi se Kraki, i cili vjen nga Juniku, ka dhënë një kontribut të jashtëzakonshëm në zhvillimin e mendimit kritik dhe politik.

Sipas saj, përmes analizave të tij të mprehta, publikimeve dhe paraqitjeve në mediat dhe mjediset akademike ndërkombëtare, Kraki ka ndihmuar në ngritjen e profilit ndërkombëtar të Kosovës.

“Jemi krenarë t’ju njoftojmë se Partisë Guxo për zgjedhjet e 9 shkurtit sot iu bashkua Nezir Kraki, profesori i njohur parisien nga Juniku, një intelektual dhe guximtar i pavarur i cili ka dhënë një kontribut të çmuar në zhvillimin e mendimit kritik dhe politik prej shume vitesh tashmë”, ka shkruar Gërvalla.

Ajo ka shkruar se “Nezir Kraki është profesor i shkencave politike dhe marrëdhënieve ndërkombëtare në Paris, njohës i shkëlqyer i politikës së jashtme dhe zhvillimeve në Ballkan, me një vizion të qartë për integrimin evropian të Kosovës”.

“Përmes analizave të tij të mprehta, shkrimeve dhe paraqitjeve frymëzuese në mediat e mjediset akademike ndërkombëtare, ai është kthyer në një zë të fuqishëm të promovimit dhe ngritjes së imazhit pozitiv të shqiptarëve në botë”.

“Me Profesor Krakin në listën tonë fituese Vetëvendosje-Guxo-Alternativa, dhe profesionistë të tjerë të guximshëm, luftëtarë të pakompromis të së vërtetës, angazhimi ynë në shërbim të Kosovës dhe qytetarëve të saj do jetë i gjithanshëm dhe dinamik edhe në mandatin e dytë. Së bashku do ta vazhdojmë rrugëtimin tonë me faqe të bardhë dhe duar të pastra për një të ardhme prosperuese për Kosovën sepse e ardhmja u takon atyre që guxojnë”, ka shkruar Gërvalla. /Telegrafi/