Presidenti i ligës shqiptare flet për bojkotin e futbollit

Fillimi i sezonit të ri futbollistik 2020/2021 u shoqërua nga një ngjarje e pazakontë siç ishte bojkoti për më se dy muaj në shenjë proteste për mosreagimin e qeverisë ndaj kërkesave emergjente të sportit jo vetëm futbollit, për një paketë ligjore financiare funksionale.

U duk se çështja u zgjidh pas premtimit të kryeministrit Edi Rama në takimin me presidentin e Federatës Shqiptare të Futbollit, Armand Duka, por deri në këto ditë të para të 2021 pak gjëra ndryshuan.

Në një intervistë për Top Channel presidenti i Ligës, Edvin Libohova, tregon këndvështrimin e tij nëse bojkoti ishte diçka që dha rezultat apo jo.

“Vetsakrifikimi i ligës e kreu funksionin pasi qeveria më në fund kuptoi nevojat e sportit. Disa u gjëra u bënë, por jo ligji i sponsorizimit që ishte më kryesori”.

“Ne do të vazhdojmë, por jo me bojkot pasi edhe bojkoti ka pasojat e veta. Këtu nuk bëhet fjalë për të zgjidhur problemet e një sezoni, por për të ardhmen”, është shprehur ai.

Gjithashtu Liga Profesioniste tentoi të shesë emrin e kampionatit në edicionin e kaluar, por procesi nuk arriti objektivin gjë që bëri drejtuesit e saj të ndryshojnë formën e ofertës ndaj bizneseve.

“U bë gjithçka me nxitim, tani do të fillojmë procedurat që në mars për sezonin e ardhshëm në shtator. Atëherë ishte një çmim 10.000 milion lekësh por tani që do të jetë më afatgjate oferta do të ndryshojë edhe çmimi”, ka shtuar Libohova.