Poposki: Me Greqinë pajtohemi se për momentin nuk mund të flasim për emrin

Ministri i jashtëm i Maqedonisë, Nikola Poposki ka deklaruar se akoma ka dallime të mëdha me Greqinë në lidhje me kontestin për emrin, transmeton Telegrafi Maqedoni.

“Me Greqinë kemi dallime serioze në raport me çështjen e emrit, por jemi pajtuar se për momentin nuk mund të bisedojmë sepse kemi pikëpamje të ndryshme”, ka vlerësuar Poposki në intervistën për Zërin e Amerikës në gjuhën maqedonase.

“Nëse flasim për në raport të çështjes së emrit, atëherë mendoj se situata është e pandryshuar, përkatësisht kemi dallime serioze, por ramë dakord se në këtë periudhë nuk mund të bisedojmë për çështje të tilla serioze që është çështja e vetme sipas së cilës kemi interesa të ndryshme, takime të ndryshme në marrëdhëniet e Maqedonisë me Greqinë”, ka thënë Poposki i cili në margjinat e Asamblesë së Përgjithshme të KB në Nju Jork është takuar me homologun e tij grek Nikos Kotzias.

“Gjithashtu, nuk mundemi të jemi naivë dhe të mos pranojmë se një vend anëtar mund ta bllokojë tërë procesin”, është përgjigjur ai në pyetjen nëse Maqedonia duhet të zgjedh mes emrit dhe anëtarësimit në NATO.

“Në këtë periudhë kohore ne treguam se edhe për NATO edhe për Maqedoninë, por gjithashtu edhe për Greqinë është shumë më mirë të shohin drejt vlerës së shtuar nga anëtarësimi ynë në NATO se sa të vazhdojnë me politikën e shantazhit në kushte në të cilat kemi marrëveshje e cila e përfaqëson të drejtën ndërkombëtare, kemi gjykim nga Gjykata Ndërkombëtare e Drejtësisë e cila gjithashtu e trason rrugën për çfarë mundet, ndërsa çfarë nuk mundet të pranohet”, ka thënë ai./Telegrafi/