Pesë arsye pse Kamala Harris mund të jetë “makthi më i keq” i Donald Trump

Zëvendës-presidentja Kamala Harris është kandidatja kryesore demokrate për t’u përballur me Donald Trump pas vendimit të presidentit Joe Biden për t’u larguar nga gara presidenciale.

Të dielën, Biden njoftoi se do të largohej nga gara pasi u përball me presionin pas debatit të tij me Trump në fund të qershorit, kur performanca e tij e dobët rriti shqetësimet për moshën dhe aftësinë e tij për detyrë.

Në letrën e tij në mediat sociale, Biden, 81 vjeç, mbështeti Harris, duke u thënë kolegëve të tij demokratë se “është koha për t’u bashkuar dhe për të mposhtur Trump”, shkruan Newsweek, përcjell Telegrafi.

Gara e Shtëpisë së Bardhë kishte qenë mes dy burrave të bardhë të moshuar, por vendimi i Biden do të thotë se Trump, 78 vjeç, ka të ngjarë të përballet me Harris shumë më të re, 59 vjeçe.

Ajo do të bënte histori si gruaja e parë me ngjyrë që do të bëhej kandidate presidenciale e një partie të madhe.

Dhe janë disa arsye pse Harris mund të përbëjë një problem të vërtetë për Trump në nëntor.

Mbledhja e fondeve

Harris është e vetmja kandidate demokrate që mund të marrë kontrollin “e shumicës së mjeteve” të fushatës së Bidenit.

Fushata e Biden tashmë ka ndryshuar zyrtarisht dosjet në Komisionin Federal të Zgjedhjeve në mënyrë që Harris të mund të përdorë fondet nëse siguron nominimin e Demokratëve.

“Në mënyrë të veçantë, për shkak se Biden dhe Harris ndajnë një komitet të fushatës, zëvendës-presidentja dhe kandidati i saj mund të vazhdojnë të përdorin fondet ekzistuese të fushatës për zgjedhjet e përgjithshme nëse ajo është në garën demokrate si kandidate presidenciale ose zëvendës-presidente”, ka thënë Trevor Potter, themelues dhe president i “Campaign Legal Center”, në një deklaratë.

Lexo po ashtu Kush është Kamala Harris dhe a do të bëhet ajo gruaja e parë presidente e SHBA-së?

Regjistrimet e Komisionit Federal të Zgjedhjeve tregojnë se fushata e Trump ka më shumë “para në dorë” sesa ajo e Bidenit.

Fushata e presidentit përfundoi qershorin me 95 milionë dollarë të mbledhura, ndërsa ajo e Trump e mbylli muajin me 128 milionë dollarë, raportoi Reuters.

Por donacionet demokrate kanë vërshuar që kur Biden u tërhoq nga gara dhe hodhi mbështetjen e tij pas Harris.

ActBlue, platforma Demokratike për mbledhjen e fondeve, raportoi ditën më të madhe të mbledhjes së fondeve të ciklit 2024 të dielën, duke thënë se “donatorët e vegjël” kishin kontribuar rreth 47 milionë dollarë që kur Harris shpalli kandidaturën e saj.

Mosha

Trump ka shpenzuar muaj duke e goditur Bidenin mbi moshën dhe aftësinë e tij për të qenë në detyrë, përcjell Telegrafi.

Por tani Trump do të jetë kandidati më i vjetër në historinë e SHBA-së nëse Harris ose dikush më i ri zëvendëson Biden në krye të garës së Demokratëve.

Sondazhet kanë treguar se shumë amerikanë mendojnë se Trump është shumë i vjetër për të shërbyer një mandat të dytë.

Entuziazmi i demokratëve

Kandidatura e Harris mund të ringjallë entuziazmin mes votuesve të rinj, një bllok vendimtar në garën e vitit 2024 dhe një bllok ku Biden po humbiste mbështetjen.

“Harris ka të ngjarë të ringjallë energjinë dhe entuziazmin pas fushatës – dikush mund ta ndiejë këtë tashmë”, ka thënë për Newsweek, Grant Davis Reeher, një profesor i shkencave politike në Universitetin e Syracuse. “Grumbullimi i hershëm i fondeve është një shenjë e mirë për të”.

Por Thomas Gift, një profesor i asociuar i shkencave politike dhe drejtor i “Center on U.S. Politics at University College London”, i tha Newsweek se demokratët “duket se po nxitojnë të bindin veten se Kamala Harris është tani një zgjedhje popullore për president”.

Biografia

Harris do të bënte histori si gruaja e parë me ngjyrë dhe aziatike e Jugut në vend që do të kryesonte garën e një partie të madhe nëse siguron nominimin e Demokratëve.

Ajo është “një kandidate historike e rëndësishme”, tha Reeher.

Lexo po ashtu Çfarë ndodh tani që Joe Biden është larguar nga gara për president të SHBA-së?

Ndërkohë, ajo ka të ngjarë të krahasojë rekordin e saj si prokurore e përgjithshme shtetërore me statusin e Trump si “një kriminel i dënuar”.

Ai u shpall fajtor në gjyqin e tij penal në New York City në fillim të këtij viti, por ende nuk është dënuar.

Të drejtat e abortit

Demokratët kanë kërkuar të bëjnë të drejtat e abortit një çështje kryesore në zgjedhjet e nëntorit.

Si grua, Harris është e gatshme të sulmojë Trumpin për këtë çështje.

Trump nuk ka mbështetur një ndalim kombëtar të abortit nëse ai rifiton Shtëpinë e Bardhë.

Ai thotë se beson se vendimet për abortin duhet t’u lihen shteteve.

Harris ka qenë veçanërisht e zëshme për të drejtat e abortit, duke thënë në qershor se “gjithçka është në rrezik” me të drejtat e shëndetit riprodhues në zgjedhjet e nëntorit.

Aborti është një pozicion fitues për demokratët, kështu që ata “do ta sjellin atë shpesh për ta mbajtur Trumpin në mbrojtje”, tha më parë Paul Goren, profesor i shkencave politike në Universitetin e Minesotës. /Telegrafi/