Reshjet e dendura kanë shkaktuar përmbytje të mëdha në shtetin amerikan të Washingtonit, gjë që ka çuar në urdhra evakuimi për dhjetëra mijëra banorë.
Guvernatori Bob Ferguson dje u bëri thirrje banorëve në zonat e rrezikuara të ndjekin udhëzimet e autoriteteve lokale dhe të evakuohen. Besohet se deri në 100 mijë banorë janë prekur nga urdhrat e evakuimit.
"E kuptoj që shumë njerëz në shtetin tonë kanë përjetuar përmbytje të mëdha në të kaluarën", tha Ferguson në një postim në X.
"Megjithatë, tani po përballemi me një situatë historike - presim 61 centimetra më shumë se niveli rekord i përmbytjeve", shtoi ai.
Ferguson tha se më shumë se 30 autostrada kryesore janë mbyllur për qarkullim. Guvernatori shpalli gjithashtu gjendjen e jashtëzakonshme në të gjithë shtetin për të mobilizuar me shpejtësi burime dhe personel shtesë.
Garda Kombëtare u dislokua për të ndihmuar në operacionet e shpëtimit në zonat e përmbytura.
Helikopterë dhe varka u përdorën për të shpëtuar njerëzit. Dhjetëra lumenj kanë dalë nga shtrati, duke përmbytur qytete dhe toka bujqësore.
Reshjet e dendura në veriperëndim të Shteteve të Bashkuara janë shkaktuar nga një fenomen meteorologjik i njohur si “lumi atmosferik”, një brez ajri jashtëzakonisht të lagësht që mund të sjellë shi intensiv për disa ditë me radhë. /Telegrafi/
