Pentagoni gjurmon një balonë të re të paidentifikuar

Aeroplanët luftarakë amerikanë kapën një balonë të paidentifikuar të premten mbi Utah, por kanë përcaktuar se nuk është një kërcënim për sigurinë kombëtare, sipas Komandës së Mbrojtjes Ajrore të Amerikës së Veriut.

Balona, e cila po udhëton afërsisht 12 kilometra mbi sipërfaqen e tokës, “nuk është e manovrueshme” dhe nuk paraqet “ndonjë rrezik për sigurinë e fluturimit”, njoftoi komanda gjersa shtoi se “nuk është e qartë se kujt i takon balona”, shkruan politico.

Incidenti vjen rreth një vit pas sagës shumë të diskutueshme njëjavore në të cilën Pentagoni gjurmoi një balonë të madhe spiune kineze që fluturoi në të gjithë Shtetet e Bashkuara përpara se të rrëzohej mbi Oqeanin Atlantik nga një aeroplan luftarak F-22.

Lexo po ashtu Kina dhe historia e çuditshme e luftës me balona

Episodi tërhoqi zemërimin e Kongresit amerikan duke pasur parasysh se sa kohë Pentagoni e kishte gjurmuar balonën e spiunazhit përpara se ta rrëzonte atë, duke e lejuar të fluturonte afër bazave ushtarake.

Zyrtarët kinezë mohuan se po kryenin mbikëqyrje, duke këmbëngulur se qëllimi i balonës ishte mbledhja e të dhënave të motit dhe se ajo kishte dalë nga kursi për shkak të erërave të paparashikueshme.

Pas atij episodi, aeroplanët luftarakë amerikanë filluan të ndërmarrin veprime më të shpejta në rrethana të ngjashme, duke rrëzuar tre objekte më të vogla ajrore mbi Kanada, liqenin Huron dhe Alaskë. /Telegrafi/