Pas djalit të tij, Biden po konsideron faljen presidenciale edhe për kritikët e Trumpit – kush mund të përfitojë?

Presidenti në largim i SHBA-së, Joe Biden po shqyrton faljet parandaluese për kritikët e shquar të pasuesit të tij Donald Trump.

Kjo është në një përpjekje për t’i mbrojtur ata nga ndëshkimi i mundshëm pasi Trump – i cili është zotuar të hakmerret kundër atyre që e kanë kundërshtuar – të marrë detyrën.

Kjo është në vazhdën e polemikave rreth faljes nga Biden të djalit të tij Hunter, i cili do të përballej me dënim këtë muaj.

Republikanët dhe disa demokratë e kanë kritikuar masën, e cila erdhi pasi presidenti tha më parë se nuk do të ndërmerrte një hap të tillë, shkruan BBC, përcjell Telegrafi.

Mediat amerikane raportojnë se ata që mund të jenë në linjë për faljet e mundshme parandaluese nga Biden përfshijnë Dr Anthony Fauci, i cili ka qenë kritik ndaj përgjigjes së Trump për Covid dhe senatori i zgjedhur i Kalifornisë, Adam Schiff, i cili udhëhoqi përpjekjen e parë të shkarkimit kundër Trump.

Ndërkohë, Sekretarja e shtypit e Shtëpisë së Bardhë, Karine Jean-Pierre tha në fillim të kësaj jave se mund të priten më shumë falje nga presidenti Biden përpara përfundimit të mandatit të tij në janar, por nuk dha detaje të mëtejshme.

“Ai po e mendon atë proces shumë tërësisht”, tha sekretarja.

Ndryshe, Donald Trump nuk është i vetmi person që kërcënon me hakmarrje ndaj atyre që mendohet se e kanë kundërshtuar atë në të kaluarën.

I emëruari i tij për drejtor të FBI-së, Kash Patel tha se ai do të ndjekë politikanët dhe anëtarët e medias, të cilët ai pretendon se pa prova ndihmuan në përmbysjen e rezultateve të zgjedhjeve presidenciale në SHBA në vitin 2020.

“Ne do t’ju ndjekim, pavarësisht nëse është penalisht apo civilisht”, tha Patel. /Telegrafi/