Paralajmëron Netanyahu: Me ndihmën e Trumpit, do ta përfundojmë punën me Iranin

Kryeministri izraelit Benjamin Netanyahu u zotua se do të “përfundojë punën” me Iranin me mbështetjen e presidentit amerikan Donald Trump.

Netanyahu po fliste së bashku me Sekretarin e Shtetit të SHBA-së, Marco Rubio, i cili po viziton Izraelin në udhëtimin e tij të parë zyrtar në rajon që nga marrja e rolit.

“Gjatë 16 muajve të fundit, Izraeli i ka dhënë një goditje të fuqishme boshtit terrorist të Iranit. Nën udhëheqjen e fortë të presidentit Trump, nuk kam asnjë dyshim se ne mund dhe do ta përfundojmë punën”, tha Netanyahu.

Ndërsa Rubio tha se “nuk mund të ketë kurrë një Iran bërthamor”, shkruan CNN, përcjell Telegrafi.

“Është e rëndësishme të theksohet vazhdimisht se nëse flasim për Hamasin ose për Hezbollahun, flasim për dhunën në Bregun Perëndimor, ose flasim për destabilizimin në Siri, ose flasim për ndonjë nga këto çështje që janë milicitë në Irak, të gjithë kanë një temë të përbashkët – Iranin”, tha Sekretari amerikan.

“Kjo duhet të adresohet”, shtoi ai.

Bëhet e ditur se agjencitë e inteligjencës amerikane paralajmëruan kohët e fundit si administratat Biden ashtu edhe Trump se Izraeli ka të ngjarë të përpiqet të godasë objektet kyçe të programit bërthamor të Iranit këtë vit.

Por, gatishmëria e Izraelit për të përdorur forcën ushtarake bie ndesh me dëshirën aktuale të presidentit Donald Trump për një marrëveshje paqeje me Teheranin dhe inteligjenca amerikane paralajmëron se sulmet e mëdha në vendet bërthamore iraniane mund të rrisin rrezikun e një lufte më të gjerë në Lindjen e Mesme.

Në përgjithësi, Izraeli është gjithashtu duke ndjekur qëllimin më të gjerë për të shkaktuar ndryshimin e regjimit në Iran, sipas një nga raporteve të fundit të inteligjencës amerikane.

Ndryshe, Rubio zbarkoi në Tel Aviv të shtunën mbrëma, ku u përshëndet nga Ministri i Jashtëm i Izraelit, Gideon Sa’ar, në pjesën e parë të udhëtimit të tij në rajon.

Ai u takua me Netanyahun në zyrën e tij në Jerusalem të dielën në mëngjes. /Telegrafi/