Të hënën në sallën e Kuvendit Komunal Obiliq, u mbajt një takim informues për testin PISA 2025, organizuar nga përfaqësuesja e MASHTI-t, Shqipe Bruqi, ushtruese detyre e Drejtoreshës së Departamentit për Digjitalizimin e Arsimit.
Në takim morën pjesë përfaqësues nga Drejtoria e Arsimit, drejtorët e shkollave fillore, të mesme të ulëta dhe të mesme të larta, koordinatorët e cilësisë dhe mësimdhënës nga fushat e kurrikulës: gjuhët dhe komunikimi, matematika, shkencat e natyrës, shoqëria dhe mjedisi.
Gjatë takimit, MASHTI shpërndau doracakë për shkollat mbi vlerësimin ndërkombëtar PISA në fushat e leximit, matematikës dhe shkencës, për Drejtorinë e Arsimit dhe drejtuesit e institucioneve arsimore.
Po ashtu, u ofruan informacione mbi adresat elektronike ku mësimdhënësit mund të gjejnë shembuj praktikë për përgatitjen e nxënësve për këtë test, me fokus në zhvillimin e orëve shtesë për përgatitje. /Telegrafi/
