Nuk do të ketë takim liderësh për ndryshimet kushtetuese në RMV

Nuk do të ketë takim liderësh për ndryshimet kushtetuese, edhe përskaj thirrjes së vazhdueshme nga kreu i opozitës Hristijan Mickoski. Kryeministri Dimitar Kovaçevski vlerëson se mendimet e palëve janë dëgjuar në takimin e liderëve në dhjetor dhe se tani debati duhet të jetë institucional.

“Vlerësoj se nuk ka nevojë për takim liderësh duke marrë parasysh se qëndrimet tashmë janë të njohura. Takimi i liderëve nuk është format institucional për marrjen e vendimeve konkrete por është format në të cilin të gjithë i thonë qëndrimet e tyre politike sa u takon çështje politike dhe qëndrimet politike ne i dëgjuam. Sa i takon asaj që të ketë debat për ndryshimet kushtetuese, ai debat është i strukturuar. Debati nuk bëhet në emision”, tha Dimitar Kovaçevski, kryeministër.

Kreu i OBRM-PDUKM-së Hristijan Mickoski, një ditë më parë, tha se është i gatshëm të sqarojë pozitat e tij për ndryshimet kushtetuese qoftë në takim liderësh, qoftë në debat televiziv.

“Unë jam i gatshëm që ta sqaroj propozimin tonë para të gjithëve dhe gjithkund dhe këtu s’kam asnjë dilemë. Kështu që nëse më ftojnë në ndonjë takim të tillë liderësh, pavarësisht se kush do ta organizojë, do të shkoj dhe do ta argumentoj këtë propozim. A do ta bëjë ftesën Stevo Pendarovski, a dëshiron Dimitar Kovaçevski të ulemi tet-a-tet ose dëshiron të jetë në përbërje më të gjerë…”, deklaroi Hristijan Mickoski.

Lëvizja Besa akoma nuk ka marrë ftesë për të emëruar përfaqësues në grupin e punës për ndryshimet kushtetuese por thotë se është e gatshme të jetë pjesë e debatit që pason.

“Sa u takon propozimeve për modele të caktuara, ne e shohim si gatishmëri që Kushtetuta të hapet dhe nëse hapet Kushtetuta edhe për rregullimin e relacioneve ndëretnike në Maqedoni të Veriut, sigurisht se ne si Lëvizje Besa jemi të interesuar, jemi të gatshëm të marrim pjesë por ne kërkojmë që çdo ndryshim i radhës i Kushtetutës të jenë në drejtim që rregullimi shtetëror të reflektojë karakterin multietnik të shtetit”, tha Bilall Kasami, kryetar i Lëvizjes Besa.

Pavarësisht se qëndrimet politike për ndryshimet kushtetuese nuk kanë lëvizur aspak nga pika zero, debati duhet të fillojë se shpejti, që të arrihen afatet për ndryshim të Kushtetutës deri në fund të vitit, me qëllim hapjen e kapitujve të anëtarësimit në Bashkimin Evropian. /Alsat/