Nuk mjafton ajo që bën Wenger

Arsene Wenger është akuzuar se nuk është trajner aq i mirë për ta drejtuar Arsenalin.

Akuzat ndaj tij i kanë drejtuar ish-lojtari i Liverpoolit, Graeme Souness dhe ish-trajneri i Topçinjve, George Graham.

Ekipi i francezit duket se edhe këtë edicion do të dështojë në dy garat kryesore – Ligën Premier dhe Ligën e Kampionëve.

Arsenali është në prag të eliminimit nga gara evropiane, pas humbjes prej 1-3 në Emirates në ndeshjen e parë të të tetës së finales nga Monaco.

Po ashtu, titulli i kampionit të Anglisë është ëndërr e paarritshme e klubit londinez këtë edicion.

“Në fillim të çdo sezoni flasim për favoritët për titull. Nuk flasim për Arsenalin në atë aspekt”.

“Pastaj flasim se çfarë do të bëjë Arsenali këtë vit, por gjithmonë e dimë përgjigjen”, ka thënë Souness për The Times duke shtuar se skuadra e Wenger vazhdimisht kualifikohet në Ligën e Kampionëve për t’u eliminuar pastaj në të tetën e finales.

“Wenger nuk do të shpëtonte në këtë mënyrë te ndonjë klub tjetër. Nuk mjafton (kjo që bën). Ai është shumë i mirë me lojtarët, nuk e kontrollon mungesën e disiplinës së tyre dhe nuk shpenzon në lojtarë”, ka theksuar skocezi.

“Ka shumë pyetje të cilat kanë nevojë për përgjigje te Arsenali tash për tash, jo vetëm për pozicionimin e Danny Welbeck, por edhe pse Santi Cazorla luan në krah të majtë dhe pse Mesut Ozil luan si anësor?”.

“Vetëm Arsene i di këto përgjigje, por jam i sigurt se ai di se çfarë po bën dhe Arsenali do të përfshihet në top-katërsh këtë sezon”.

“Megjithëse, sipas mendimit tim, kjo nuk mjafton. Arsenali duhet të jetë në grupin e atyre që garojnë për titull”, ka deklaruar Graham për Radio 5 Live. /Telegrafi/