Një 28-vjeçar gjendet i vdekur brenda veturës në Prishtinë, dyshohet për vetëvrasje

Mbrëmjen e së enjtes, një 28-vjeçar është gjetur pa shenja jete në një veturë në rrugën “Sokol Sopi” (lagjja Mati 1) në Prishtinë.

Lajmin e ka konfirmuar për Telegrafin, zëdhënësi i policisë për rajonin e Prishtinës, Agron Borovci, i cili thotë se vdekjen e viktimës e ka konstatuar ekipi i mjekëve në vendin e ngjarjes.

“Rreth orës 21:00, kemi pranuar informatën për një trup të pajetë, në një veturë në rrugën “Sokol Sopi” në Prishtinë. Policia menjëherë ka dalë në vendin e ngjarjes si dhe ekipi i mjekëve emergjent të cilët kanë konstatuar vdekjen  e viktimës, mashkull, rreth 28 vjeç”, ka thënë ai.

Borovci thotë se dyshimet e para janë se bëhet fjalë për vetëvrasje.

“Përkundër që mbështetur në informacionet e para, dyshimet e ngritura sugjerojnë se bëhet fjalë për vetëvrasje, policia me kujdes të shtuar po vijon ndërmarrjen e të gjitha veprimeve hetimore dhe të ekzaminimit, me qëllim sqarimin e plotë të rrethanave të ngjarjes. Aktualisht policia në koordinim me prokurorin e shtetit ka nisur një hetim mbi vdekjen”, ka theksuar ai.

Aktualisht policia në koordinim me prokurorin e  shtetit ka nisur një hetim  mbi vdekjen./Telegrafi/