Nis zhvillimi i Firefox për Metro UI

Nga Mozilla kanë lajmëruar se gjatë javës ka filluar zhvillimi i Firefox për Windows 8. Aplikacioni, si dhe të gjitha aplikacionet tjera moderne të Windows 8, do të përdorë ndërfaqen Metro.

Natyrisht, përkrahja për desktopin e zakonshëm Windows nuk do të mungoj, e Firefox do të mund të përdoret edhe në mënyrën klasike siç e kemi përdorur deri tani. Përparësi e zhvillimit të shfletuesit për të dyja ndërfaqet, sipas Mozillas, është në faktin se aplikacioni do të ketë mundësi të ekzekutohet jashtë sandboxit Metro, ndërsa do të ketë qasje në pjesën më të madhe të funksionaliteteve të Win32 API-së, si dhe në mbarë WinRT. Kjo do të mundësoj zhvillimin e shfletuesit të fuqishëm për ndërfaqen Metro që do të ofroj një përvojë të njëjtë të përdorimit si dhe në versionin për desktopin klasik, janë të bindur në Mozilla.

Fatkeqësisht për Mozillan, shfletuesi në ndërfaqen Metro do të mund të përdoret vetëm në rast se është i vendosur si shfletues preferencë (default) i kompjuterit. Gjithashtu, duke pasur parasysh se Firefoxi i ri nuk do të jetë një Metro aplikacion i thjeshtë, në Mozilla nuk janë të sigurt nëse do të kenë mundësinë që Firefoxin ta shpërndajnë përmes Windows Store. /Telegrafi/