Nis blerja e teksteve shkollore, prindërit të kënaqur se s’ka mungesa

Shtëpia Botuese “Dukagjini” po shpërndan tekstet shkollore në gjithë Kosovën. Pronarja e librarisë “ABC” në Gjilan, Afërdita Mehmeti, ka thënë se furnizimi me libra është kryer në kohë dhe se ka fluks mjaft të madh të prindërve që kërkojnë blerjen e teksteve shkollore. Këta të fundit shprehen të kënaqur se nuk pati mungesë të librave.

Kthimi në bankat shkollore është afruar e kjo nënkupton edhe pajisjen me tekste shkollore të nxënësve.

Në librarinë “ABC” në Gjilan, shitjen e tyre e kanë nisur që nga e hëna me pranimin e teksteve nga shtëpia botuese “Dukagjini”.

E pronarja, Afërdita Mehmeti thotë se interesimi ka qenë i lartë.

“Me tekstet shkollore jemi furnizu me 20 gusht. Ka qenë hapësirë e mirë me prindërit, 90 përqind e librave kanë ardh…, përndryshe të Dukagjinit i kemi të gjitha. Veç e treta ditë është që ka fluks të madh, ka numër të madh të prindërve që po kërkojnë të furnizohen me libra”, ka thënë pronarja e librarisë “ABC”, Afërdita Mehmeti.

Mehmeti thotë se më së shumti kërkesa ka nga prindërit, fëmijët e të cilëve janë në klasën e gjashtë dhe nëntë.

E me nisjen e procesit, prindërit shprehen të kënaqur se pajisjen me tekste për fëmijët e tyre po e kanë të lehtë.

“I mora librat, të gjitha i gjeta. Boll jam frigua që kam me prit në rend por jo, mirë kreva punë, të gjitha librat u gjenden”, ka thënë Çlirim Bunjaku, prind.

“Nuk është e vështirë se në librarinë “ABC” po gjinden të gjithë librat, s’ka probleme për ata që po i kërkojnë. Këtu në librari u gjendën të gjitha librat që më nevojiteshin”, ka thënë prindi tjetër, Azem Mujku.

Për nxënësit e Gjilanit, libraria “ABC” do të jetë e hapur nga ora 9:00 deri në 22:00, për t’u pajisur me tekste shkollore.