Nga Vokrri te Hasi, vëllezërit Muriqi dhe Rrahmani – IFFHS publikon ‘formacionin e ëndrrave’ të Kosovës

Federata Ndërkombëtare e Historisë dhe Statistikave të Futbollit (IFFHS) ka publikuar një formacion të ëndrrave të Përfaqësueses së Kosovës.

Kosova ka qenë vatër e talenteve ndër vite, ndërsa në të kaluarën shumë yje kanë bërë karrierë të klube të njohura evropiane.

Legjenda Fadil Vokrri, vëllezërit Fadil dhe Xhevdet Muriqi, Besnik Hasi, Kujtim Shala, Ardian Kozniku janë vetëm disa nga emrat që kanë bërë karrierë të madhe në të kaluarën.

Viteve të fundit, Dardanët janë përfaqësuar nga yje si Amir Rrahmani, Samir Ujkani, Milot Rashica dhe Arbër Zeneli.

Por, kush cilësohen si emrat më të mëdhenj të futbollit të Kosovës?

IFFHS ka publikuar një formacion të ëndrrave të Përfaqësueses së Kosovës, me lojtarë të gjeneratave të ndryshme, shkruan Telegrafi.

Federata Ndërkombëtare e Historisë dhe Statistikave të Futbollit nuk ka lënë pa përfshirë emra të mëdhenj nga e kaluara, ndërsa nga aktualët vend zënë vetëm dy futbollistë.

Kapiteni Amir Rrahmani, i cili luan te Napoli dhe portieri Samir Ujkani te Empoli janë dy lojtarët aktual që zënë vend në ‘formacionin e ëndrrave’ të Kosovës të përpiluar nga IFFHS.

Në këtë formacion me renditje 4-4-2, nuk kanë si të mungojnë emra legjendash si ai i presidentit të ndjerë të FFK-së, Fadil Vokrri, si dhe vëllezërve Fadil dhe Xhevdet Muriqi.

Nga legjendat e gjeneratave më të vjetra zënë vend edhe emra si Faton Domi, Kujtim Shala, Xhevat Prekazi dhe Ardian Kozniku.

Në këtë formacion dallohen edhe dy ish-lojtarët e Kombëtares së Shqipërisë, por që janë të lindur dhe rritur në Kosovë, Besnik Hasi dhe Debatik Curri.

Formacioni i ëndrrave nga IFFHS

/Telegrafi/