Netanyahu: Do ta prezantoj para qeverisë marrëveshjen e armëpushimit me Hezbollahun

Benjamin Netanyahu ka folur para gazetarëve pas takimit me kabinetin qeveritar izraelit.

Ai thotë se është krenar për “qëndrueshmërinë” e treguar nga izraelitët që jetojnë në veri dhe shton se Izraeli do t’i kthejë qytetarët e veriut në shtëpitë e tyre.

Kryeministri izraelit thekson se vendi është i angazhuar për “shkatërrimin e Hamasit”, shkruan skynews.

Sa i përket Libanit, ai thotë se “unë po shikoj të gjitha frontet njëkohësisht”.

“Prandaj, do të paraqes para kabinetit një plan të armëpushimit me Libanin”, deklaroi kreu i qeverisë izraelite.

“Koha e armëpushimit varet nga ajo që ndodh në Liban. Nëse Hezbollah përpiqet të na sulmojë, nëse e armatos veten dhe rindërton infrastrukturën pranë kufirit, ne do të sulmojmë”, pohoi 75-vjeçari.

Ai vazhdon duke thënë se është “koha e duhur për një armëpushim” për tri arsye: kërcënimi iranian, rifreskimi i forcave izraelite dhe izolimi i Hamasit.

“Një marrëveshje e mirë është një marrëveshje që zbatohet dhe ne do ta zbatojmë atë”, shtoi Netanyahu.

Ndryshe, Izraeli muaj më parë ka nisur një ofensivë ushtarake kundër militantëve libanez të Hezbollahut, të cilët iu bashkëngjiten sulmeve të Hamasit. /Telegrafi/