Në Jemen, babai ekzekutohet publikisht me AK-47, për vrasjen e vajzave të tij

Një baba është ekzekutuar publikisht pasi u shpall fajtor për vrasjen e tre vajzave të tij.

Sipas mediave të huaja, përcjell Telegrafi, Ali Abdullah al-Noami la tre vajzat e tij Rahaf, 7, Raghad, 12 dhe Malak, 14, për t’u mbytur në një rezervuar uji pas një grindje me gruan e tij.

Së bashku me dy vrasës të tjerë të dënuar për vrasje të fëmijëve – Abdullah Ali al-Mukahali, 38 vjeç dhe Mohammed Abdullah Arman, 33 vjeç – dyzetvjeçari u dërgua në Sheshin Tahrir në qendër të kryeqytetit kushtetues të Jemenit, Sana’a dhe u gjunjëzua në një qilim të kuq.

Një “xhelat” duke përdorur një pushkë Kalashnikov AK-47 më pas qëlloi të tre burrat në pjesën e pasme në pamje të plotë të një turme të madhe spektatorësh, disa prej të cilëve po filmonin ekzekutimet në celularët e tyre dhe kamera.

Abdullah Ali al-Mukahali dhe Mohammed Abdullah Arman ishin dënuar për përdhunimin dhe vrasjen e një djali tetë vjeçar të quajtur Mohammed al-Haddad.

Ligjet aktuale në Jemen lejojnë dënimin me vdekje për një gamë të gjerë krimesh përfshirë vrasjen, rrëmbimin, përdhunimin, tradhtinë bashkëshortore, homoseksualitetin dhe një numër të veprave fetare.

Pasi u qëlluan të tre burrat, një mjek i kontrolloi shpejt çdo trup për të siguruar që të gjithë kishin vdekur.

Të tre trupat ishin mbështjellë me qese të bardha trupi, të cilat ushtarët me uniforma maskimi më pas i morën me vete.

Ky thuhet të ishte ekzekutimi i parë publik në qytet që nga gushti i vitit 2018, kur tre burra të dënuar për përdhunim dhe vrasje të një fëmije u qëlluan, dhe më pas trupat e tyre u shfaqën të varur nga një vinç.

Ndërsa shumë vende mbajnë dënimin me vdekje, veçanërisht Kina që ekzekuton më shumë të dënuar të saj sesa pjesa tjetër e botës së bashku, vetëm një pjesë e vogël kryejnë ekzekutime publike. /Telegrafi/