Ndërrimi i drejtorëve në Komunën e Prishtinës, po konsiderohet eksperiment i keq

Ndërrimi i drejtorëve në Komunën e Prishtinës nga partitë opozitare dhe shoqëria civile po konsiderohet si plotësim i pozitave me militantë partiakë pa përvojë pune. Sipas tyre ky është një eksperiment i keq që në të kaluarën nuk ka dhënë asnjë efekt në ngritje të efikasitetit në dobi të qytetarëve.

Lidhja Demokratike e Kosovës shprehet se ndërrimi i drejtorëve nuk pritet të rrit efikasitetin e punës dhe për këtë arsye nuk pritet të ketë sukses.

Asambleistja Vlora Dumoshi thotë se më e pakta 6 muaj do t’iu duhet drejtorëve të rinj për t’u përshtatur me punën e tyre.

“Ne nuk presim që të ketë sukses. Kjo është një retorikë e tij personale e kryetarit. Vetë fakti tash në mbledhjen e fundit, raporti i buxhetit tregon që 25 milionë i ka bartje për vitin e ardhshëm… Këtyre drejtorëve të rinj veç me u ambientuar në drejtori iu duhet së paku gjashtë muaj ditë deri në 1 vit, kështu që nuk pres sukses… Kjo është puna e koalicionit aty për brenda. Na e shohim që ata nuk kanë asnjë gjuhë të përbashkët”, thotë Dumoshi.

Ndërsa, partia tjetër opozitare, Lëvizja Vetëvendosje përmes asambleistit, Eman Rrahamani shprehet se ndërrimi i drejtorëve është bërë më shumë për t’i plotësuar tekat dhe interesat e grupeve të caktuara, e jo për të ngritur efikasitetin e punës së atyre drejtorive.

Sipas tij, një drejtor që nuk ka pasur sukses në një drejtori, nuk mundet me pas sukses në drejtorit tjetër.

Këtë, siç thotë ai, e dëshmon efikasiteti i tyre i dobët i secilit prej tyre.

“Në komunën e Prishtinës nuk ka interesim për me punuar për qytetarët, mirëpo për me i plotësuar tekat dhe interesat e grupeve të caktuara ku qëllim kryesor pra është ai, dhe jo puna dhe investimi për qytetarët… Puna e drejtorëve është punë menaxheriale. Një drejtor që nuk ka pasur sukses në një drejtori nuk mundet me pas sukses në drejtorin tjetër për shkak se në punën e drejtorive ka të bëjë me menaxhimin e stafit dhe punës së asaj drejtorie… Në qoftë se nxjerr një performacë të secilit drejtor atëherë mundesh me i pa rezultatet e tyre që nuk kanë qenë as minimale. Po flas vetëm për drejtorin e pronës që të cilin ne kemi jashtëzakonisht probleme me pronat që na vijnë në kuvendin komunal”, deklaron ai.

Nga iniciativa për progres (INPO), monitoruesi i punës së kryeqytetit, Qëndrim Arifi shprehet se këto eksperimente nuk mund të rritin cilësinë e punës drejtoreve, ndërsa konsideron se nuk kanë dhënë asnjë efekt në të kaluarën.

“Këto eksperimente me drejtorët nuk është qe e rritin cilësinë e tyre dhe rritin mirëqenien e qytetarëve të Komunës së Prishtinës. Këto janë eksperimente të këqija që nuk kanë dhënë efekt në të kaluarën, e aq më pak shtoja faktin se drejtori i pronës, kalon në mirëqenie sociale. Nuk e di ku kryetari i Komunës i ka marr ato pika të forta të këtij drejtori nga një dikaster që ka mund të them që ka dallueshmëri të madhe mes tjetrit… Mandati i kryetarit është katër vite. Nëse vazhdohet kështu çdo vit të shikon t’i lë hapësirë një vit të tregoj vetën”, deklaron Arifi.

Njohësi i çështjeve lokale, Rasim Aliaj thekson se gjatë këtij mandati cilësia e drejtorëve në komunë të Prishtinës ka qenë sipërfaqësore vetëm sa për të plotësuar numrin.

Duke përmendur rolin e Lëvizjes Vetëvendosje gjatë mandatit të parë të Ahmetit, Aliaj thotë se pa këtë parti, kryetari i Prishtinës ka hyrë në këtë vallen e pranimit të presioneve nga subjektet e tjera politike.

Përkundër insistimit disa ditor të KosovaPress, kryetari Shpend Ahmeti ka qenë i pa qasshëm për t’u deklaruar për këtë çështje./kp/Telegrafi/