Mundet Duqu

Sipas fjalëve të gjeneralit Gholamreza Jalalija, programerët e qeverisë iraniane kanë arritur të dizajnojnë softuerin i cili mundëson mbrojtjen nga virusi i quajtur Duqu.

Softueri është në dispozicion për organizatat qeveritare, por edhe korporatat vendore të cilat u gjetën nën sulmin e këtij virusi.

Duqu është mjaftë i ngjashëm me Stuxnetin, virusin me të cilin qeveria Iraniane tashmë pati probleme kohë më parë, e i cili ishte i dizajnuar për sulmimin e sistemeve kompjuterike industriale të Siemensit të cilat Irani përdorë në stabilimentet e veta nukleare.

Edhe pse Duqu infektoi edhe kompjuterët në Britani të Madhe, Francë dhe Indi, më së shumë infektime (rreth 30-mijë) ishin në Iran.
Duke pasur parasysh nivelin e infektimit dhe ngjashmëritë me Stuxnet, Iranianët dyshojnë se për të dy viruset janë përgjegjës shërbimet sekrete amerikane dhe izraelite. SHBA-të dhe Izraeli nuk komentuan akuzat e bëra nga Iranianët.

Duqu për penetrimin në sistemin kompjuterik përdorë një lëshim deri tani të panjohur në engine-in për parsimin e fonteve në sistemin operativ Windows. Mjaftë interesant është se virusi nuk është i dizajnuar për sabotimin e sistemeve (sikurse Stuxnet), por vetëm për mbledhjen e informatave të cilat do të mund të lehtësonin sulmin në sistemet e këtilla në të ardhmen. /Telegrafi/