MPJ përsërit rekomandimin: Qytetarët e RMV-së të përmbahen nga udhëtimi në Rusi, ata që kanë mundësi të largohen nga vendi

Ministria e Punëve të Jashtme e Republikës së Maqedonisë së Veriut përcjell nga afër zhvillimin e situatës në Federatën Ruse dhe është në komunikim të vazhdueshëm me partnerët dhe aleatët tanë. Në këtë kontekst, rikujtojmë se është ende në fuqi rekomandimi i ministrisë i publikuar më 28.02.2022, që të gjithë qytetarët e Maqedonisë së Veriut të përmbahen nga udhëtimi në Federatën Ruse dhe ata që kanë mundësi të largohen nga vendi, transmeton Portalb.mk.

Në të njëjtën kohë, të gjithë qytetarët e Maqedonisë së Veriut që aktualisht ndodhen në Federatën Ruse mund të kontaktojnë Ambasadën në Moskë në numrin e telefonit:

+7 925 025-98-05 (celular),
e-mail: nenad.kolev@mfa.gov.mk
“Qytetarët e Maqedonisë së Veriut mund të kontaktojnë edhe Ministrinë e Punëve të Jashtme në numrin e telefonit +389 75 273 732 dhe në adresën elektronike: globalsos@mfa.gov.mk”, thonë nga MPJ.

Grupi mercenar rus Wagner, i udhëhequr nga Yevgeny Prigozhin, mëngjesin e sotëm ka pushtuar objektet ushtarake në qytetin e Rusisë, Rostov-on-Don. Presidenti rus, Vladimir Putin, aktin e tillë e ka quajtur “tradhti” dhe e ka akuzuar atë për “rebelim të armatosur”. Në përgjigje të kësaj, Prigozhin, është zotuar se do t’i provojë të gjitha mënyrat për të rrëzuar udhëheqësinë ushtarake të Rusisë.