Mickoski, Jotovës: Autoritetet bullgare të lejojnë komunitetin maqedonas të paktën të organizohet në organizata joqeveritare

Kryeministri i Maqedonisë së Veriut, Hristijan Mickoski u kërkon autoriteteve bullgare të lejojnë komunitetin maqedonas të paktën të organizohet në organizata joqeveritare, përcjell Telegrafi Maqedoni.

“Ne si shtet respektojmë dhe veprojmë nëse ka gjykime të tilla nga institucioni që është përgjegjës për marrjen e vendimeve për respektimin ose mosrespektimin e të drejtave të njeriut. Është Gjykata e të Drejtave të Njeriut në Strasburg. Fatkeqësisht, ne kemi shtete anëtare në Evropë që kanë dhjetëra vendime të tilla që nuk i respektojnë. Supozoj se kjo do të vlejë edhe për shtetet anëtare, e jo vetëm për kandidatët”, tha kryeministri Hristijan Mickoski me rastin e deklaratave të fundit të nënpresidentes bullgare Iliana Jotova drejtuar autoriteteve maqedonase.

Mickoski e udhëzoi Jotovën që t’u japë këshilla atyre vendeve anëtare të BE-së që më në fund duhet t’i respektojnë të drejtat e njeriut.

“Kemi 14 aktgjykime për komunitetin maqedonas në Bullgari. Unë u bëj thirrje të njëjtëve që na japin këshilla, të këshillojnë autoritetet bullgare, të lejojnë komunitetin maqedonas të paktën të organizohet në organizata joqeveritare. Nuk kërkojmë të jemi pjesë e Kushtetutës, por të jemi të organizuar në organizata joqeveritare. Në atë drejtim mund ta bëjnë”, tha Mickoski nga komuna e Gazi Babës, ku mori pjesë në vendosjen e gurthemelit të objektit të ri shkollor.

Jotova dje nga Qyustendili këshilloi se Maqedonia duhet t’i kuptojë më mirë vlerat evropiane.

“Dëshiroj t’u bëj thirrje kolegëve të mi nga Republika e Maqedonisë së Veriut që t’i lexojnë vlerat evropiane me mirëkuptim më të madh, sepse atëherë, kur të fillojnë negociatat reale për anëtarësim në BE, ka një kapitull të parë kryesor “Të drejtat themelore”. Këto të drejta kalojnë gjatë gjithë procesit të negociatave dhe nëse ka të paktën një vend që beson se nuk respektohen të drejtat e njeriut, veçanërisht ato të përfaqësuesve të kombeve dhe popujve të ndryshëm, ky proces nuk do të përfundojë kurrë”, tha Jotova./Telegrafi/