Mickoski: Jemi të gatshëm të krijojmë kuorumin në Kuvend për ligjet që kanë të bëjnë me krizën

Kryetari i OBRM-PDUKM-së Hristijan Mickoski, thotë se deputetët e partisë së tij janë të gatshëm të krijojnë kuorum në Kuvend për katër ligje që lidhen me krizën, në rast se vendosen në rend dite nesër.

Mickoski thotë se janë të gatshëm të krijojnë kuorum dhe të dalë në sipërfaqe se kush punon për interesat e qytetarëve, përcjell Telegrafi Maqedoni.

“Në mënyrë që të mos ketë justifikime dhe të dalë në sipërfaqe fakti kush punon për interesat e qytetarëve dhe kush për interesin e tij personal, unë i kërkoj Kuvendit në seancën e nesërme ku parashikohen pyetje deputetësh, para saj të caktohet seancë me katër ligjet që janë me interes për qytetarët, ekonominë dhe që lidhen me situatën e krizës, ose më saktë: Vendim për vazhdimin e gjendjes së krizës për shkak të virusit korona dhe ndryshimet në ligjin pr mbështetje financiare të punëdhënësve, mbështetje financiare për personat fizik që janë të vetëpunësuar dhe janë goditur nga kriza dhe ndryshimet në ligjin për tatimin e të ardhurave personale. Theksoj edhe një herë, edhe pse mbështetja nga Qeveria është e vogël dhe e pamjaftueshme për kompanitë dhe qytetarët, ajo përsëri do të mbështetet nga deputetët e OBRM-PDUKM-së”, thotë Mickoski.

Ai më tej shtoi se kjo është një kërkesë e hapur për Qeverinë, të cilës i kërkoi edhe të ndalojë manipulimet dhe sjelljet e papjekura./Telegrafi/