Meta nxjerr videon e dytë kundër Ardian Dvoranit

Presidenti Ilir Meta publikon një tjetër video, që sipas tij, tregon shkeljet e kreut të KED, Ardian Dvorani.

Duke e cilësuar si spoti i dytë në mbrojtje të Kushtetutës dhe integritetit të Gjykatës Kushtetuese, kreu i shtetit ngre pyetjen se “Si shpjegohet që Dvorani shkel Kushtetutën, ligjin dhe del mbi vendimet e KED dhe i rrëmben kompetencat e Presidentit?”

Ndër të tjera, Meta shprehet se spoti i dytë iu jep sqarim shterues disa pyetjeve që lidhen me spotin e parë, ndërsa e akuzon Dvoranin se nuk ka publikuar 32 mbledhje të KED.

“Të dashur qytetarë, Në vijim të spotit të parë, sot autorizova publikimin e spotit të dytë zyrtar në mbrojtje të Kushtetutës dhe integritetit të Gjykatës Kushtetuese. Disa nga pyetjet që lidhen me spotin e parë, marrin një sqarim shterues përmes këtij spoti të dytë që po ndaj me ju”, shkruan Meta.

Kujtojmë se përplasja mes Metës dhe Dvoranit nisi për procesin e përzgjedhjes së anëtarëve të Gjykatës Kushtetuese, ku presidenti e akuzoi kreun e KED se ka shkelur Kushtetutën, duke mos respektuar radhën e përzgjedhjes së emrave nga institucionet përkatëse, përkatësisht 3 nga Presidenca, 3 nga Kuvendi dhe 3 nga Gjykata e Lartë.

Pas përplasjeve të forta në distancë, Presidenti Meta paralajmëroi se do të publikonte edhe video, që sipas tij, përmbanin fakte përvëluese kundër Ardian Dvoranit. /Telegrafi/