Meta lanson një shërbim abonimi të realitetit virtual (VR)

Kompania mëmë e Facebook, Meta, ka lansuar një shërbim abonimi të realitetit virtual (VR) pasi po përpiqet ta bëjë atë pjesë të biznesit të saj fitimprurës.

Meta thotë se përdoruesit me pagesë do të kenë akses në dy lojëra të reja në muaj, transmeton Telegrafi.

Për tre muajt e parë të vitit, kompania mëmë e Instagramit pati një humbje prej 4 miliardë dollarësh në njësinë e saj VR.

Meta përballet me konkurrencë nga firmat, përfshirë gjigantin e teknologjisë Apple, i cili lansoi kufjet e tij të shumëpritura me realitet të përzier këtë muaj.

Të hënën, kompania tha se shërbimi Meta Quest+, që kushton 7,99 dollarë në muaj ose 59,99 dollarë për një abonim vjetor, ishte i pajtueshëm me kufjet e tij Quest 2, Quest Pro dhe kufjet e ardhshme Quest 3.

Në vitin 2021, shefi ekzekutiv i Meta-s, Mark Zuckerberg zbuloi planet për të ndërtuar një “metaverse” – një botë në internet ku njerëzit mund të luajnë lojëra, të punojnë dhe të komunikojnë në një mjedis virtual, shpesh duke përdorur kufje VR.

“Me kalimin e kohës, shpresoj që ne të shihemi si një kompani metaverse dhe dua të ankoroj punën dhe identitetin tonë në atë që po ndërtojmë”, tha Zuckerberg.

Në shkurt të vitit të kaluar, Meta prezantoi disa projekte ambicioze të inteligjencës artificiale dhe Zuckerberg e përshkroi AI-n si “çelësin për zhbllokimin e metaversit”. /Telegrafi/