Mercedes-Benz i dorëzon Papa Françeskut çelësat e versionit tërësisht elektrik të Popemobile

Papa Françesku u pa duke inspektuar “Popemobile” në Vatikan, versionin e parë tërësisht elektrik të automjetit të famshëm.

I ndërtuar nga Mercedes-Benz, markë kjo e cila ka furnizuar me vetura Vatikanin për gati 10 vjet, Popemobile i ri u zbulua në një ceremoni pjesë e së cilës ishin Papa dhe udhëheqësia e kompanisë.

“Ky është një nder i veçantë për kompaninë tonë dhe unë do të doja të falënderoja Papën për besimin e tij”, tha Ola Kallenius, kryetar i bordit të menaxhmentit të Mercedes-Benz Group AG.

“Me këtë Popemobile, ne po dërgojmë gjithashtu një thirrje të qartë për elektromobilitet dhe dekarbonizim”, shtoi ai.

Bëhet e ditur se automjeti është një version i modifikuar i SUV-it luksoz të mesëm G-Class, i cili zakonisht shitet për rreth 150 mijë dollarë, përcjell Telegrafi.

Një nga ndryshimet kryesore me këtë model të veçantë është një ulëse e veçantë për Papën, e rrethuar me xham, në mënyrë që ai të mund të qëndrojë dhe të shihet nga dashamirësit ndërsa kalon.

Sipas Mercedes-Benz, zhvillimi i automjetit zgjati rreth një vit, duke përfshirë përshtatjen e motorit për përdorim me shpejtësi më të ulëta gjatë ngjarjeve.

Klaus Millerferli, inxhinier zhvillimi në Mercedes-Benz AG në Sindelfingen, tha në një deklaratë se përpjekja bashkëpunuese përfshin “pasion të madh, profesionalizëm dhe respekt për detyrën”.

“Automjeti përfaqëson një sasi të pabesueshme të punës dhe pasionit – por është gjithashtu me teknologjinë më të fundit”, tha Millerferli.

“Fakti që Papa Françesku ka ftuar disa prej nesh ta dorëzojmë atë personalisht, me të vërtetë kryeson gjithçka”, shtoi ai.

Kredencialet e gjelbra të automjetit të ri ka të ngjarë të mirëpriten nga Papa, i cili ka folur vazhdimisht për ndryshimin e klimës dhe nevojën për veprime urgjente për të adresuar shkaqet dhe efektet e saj. /Telegrafi/