MAGA vs miliarderët

Burimi: The Financial Times
Përkthimi: Telegrafi.com

Donald Trump nuk është ende në detyrë, por koalicioni i tij i çuditshëm politik, i përbërë nga mbështetësit anti-emigrantë të MAGA-s dhe miliarderë globalistë, ka filluar të pësojë përçarje që tani.

Shkaku më i fundit ishte emërimi i Sriram Krishnanit si këshilltar i lartë i Trumpit për politikën mbi inteligjencën artificiale. Krishnan është një amerikan me origjinë indiane, që ka lidhje të ngushta si me Trumpin ashtu edhe me Elon Muskun (ai ndihmoi në transformimin e Twitter-it në X). Krishnan, ashtu si Musku, dëshiron ta bëjë më të lehtë hyrjen e punëtorëve të kualifikuar të huaj në ShBA me viza të përkohshme H-1B.

Ndërkohë që Lugina e Silikonit mbështetet te këto viza për shkak të mungesës së punëtorëve të kualifikuar në ShBA, mbështetësit e MAGA-s janë kundër tyre, jo vetëm sepse ata preferojnë punëtorët e huaj, por edhe sepse mund të ulin pagat në sektorin teknologjik amerikan. Sipas një raporti të vitit 2020 nga Instituti i Politikave Ekonomike (një organizatë me prirje të majta), 60 për qind e vizave H-1B te 30 punëdhënësit më të mëdhenj ofrojnë paga dukshëm më të ulëta se mesatarja lokale për ato vende pune. Pozicioni i Trumpit për këtë çështje ka ndryshuar shpesh; teksa tani duket se i mbështet këto viza, në vitin 2016 i quajti ato një “program pune të lirë”.

Kjo përçarje shkaktoi një debat të fortë në internet mes Muskut dhe aktivistes së MAGA-s, Laura Loomer, e cila e quan veten një “islamofobe krenare” dhe kërkon që vendet e punës H-1B t’u jepen studentëve amerikanë të shkencave, teknologjisë, inxhinierisë dhe matematikës. “Vendi ynë u ndërtua nga evropianët e bardhë … Jo nga pushtues të botës së tretë nga India”, postoi ajo në X. “Nuk është racizëm kundër indianëve nëse kërkon politikat origjinale të MAGA-s për të cilat votova. Votova për reduktimin e vizave H-1B, jo për zgjerimin e tyre”.

Ndërkohë, Musku e mbrojti programin e vizave, duke shkruar: “Arsyeja pse jam në Amerikë, bashkë me kaq shumë njerëz të rëndësishëm që ndërtuan SpaceX-n, Tesla-n dhe qindra kompani të tjera që e bënë Amerikën të fortë, është për shkak të vizave H-1B. Bëje një hap prapa dhe q… në fytyrë. Do të hyj në luftë për këtë çështje, siç nuk mund ta imagjinosh dot”.

Nga e gjithë kjo mund të nxirren shumë mësime. Por, si zakonisht kur kemi të bëjmë me diçka që ka të bëjë me Trumpin, dikush do të dëshironte që personazhet që i ilustrojnë këto mësime të ishin disi më pak toksikë.

Postimet e Loomerit janë ksenofobike, por është guxim të përballesh me Muskun dhe të hapësh një çështje të rëndësishme: si të sigurohet që punëtorët amerikanë të mbështeten siç duhet përballë konkurrencës globale. Fakti që shteti dështoi ta bëjë këtë në sektorin e prodhimit nga fundi i viteve ‘80 të shekullit XX, është një nga arsyet pse Amerika përfundoi me Trumpin.

Nga ana tjetër, Musku është një kapitalist i paskrupullt që nuk heziton të përdorë fuqinë e tij për të frikësuar njerëzit. Loomer pretendon se pas betejës në internet me të, humbi verifikimin në X dhe mundësinë për të fituar nga postimet e saj.

Por, ai gjithashtu ka të drejtë kur thotë se Amerika ka nevojë për shumë më tepër inxhinierë sesa ka aktualisht. Për më tepër, suksesi i sipërmarrësit të lindur në Afrikën e Jugut – ashtu si ai i kaq shumë njerëzve të tjerë në Luginën e Silikonit dhe në radhët e drejtuesve kryesorë të korporatave amerikane – pasqyron, ndoshta, forcën më të madhe të Amerikës: hapjen ndaj emigrantëve.

Kjo përplasje ka rëndësi sepse pasqyron një përçarje themelore brenda koalicionit të Trumpit, një përçarje që vetëm do të thellohet. Mbështetësit e MAGA-s dhe globalistët nuk janë në mosmarrëveshje vetëm për emigracionin, por edhe për mbrojtjen, punësimin dhe lirinë e fjalës. Ky është një koalicion që ka pasur si pikë të vetme të përbashkët: dëshirën për të rrëzuar qeverinë e mëparshme. Tani që e kanë bërë këtë, është e pamundur që të arrijnë konsensus për çështje të tjera.

Ka dy gjëra të tjera për të thënë rreth debatit mbi vizat H-1B. Së pari, demokratët tashmë po përpiqen të përfitojnë nga përçarjet që po shfaqen në kampin e Trumpit. Një memorandum i shkruar nga një grup i vogël avokatësh, sipërmarrësish dhe akademikësh, i cili qarkulloi javën e kaluar, vuri në dukje se “konflikti Loomer-Musk përfaqëson një mundësi unike për të ndërtuar një koalicion me fraksionet e pakënaqura të Partisë Republikane”, duke përfshirë ata që janë të shqetësuar për oligarkinë teknologjike, lirinë e fjalës, të drejtat e punëtorëve dhe sigurinë kombëtare. Për këtë të fundit, marrëdhëniet e biznesit të Muskut në Kinë dhe bisedat e raportuara me presidentin rus Vladimir Putin kanë ngjallur tashmë shqetësime në komunitetin e mbrojtjes.

Memorandumi ka marrë komente pozitive nga disa zyrtarë dhe ish-zyrtarë të profilit të lartë të së majtës, si dhe nga studiues, grupe mendimi dhe këshilltarë të sindikatave. Në fund të javës së kaluar, senatori progresist Bernie Sanders ndërhyri në këtë çështje, duke akuzuar Muskun për shtyrjen përpara të vizave H-1B me qëllimin për të marrë “punëtorë më të lirë”, jo më të zgjuar.

Vëzhgojeni këtë çështje me kujdes. Lufta mes republikanëve dhe demokratëve për klasën punëtore do të jetë beteja kryesore politike për katër vitet e ardhshme dhe më tej.

Së dyti, megjithëse e shoh veten të habitur që po e shkruaj këtë, vetë Trumpi ka një ide politike që mund të ndihmojë në rritjen e numrit të amerikanëve të kualifikuar për punë të mira në teknologji. Ai ka propozuar krijimin e një universiteti falas në internet, të quajtur Akademia Amerikane, i cili do të ofrojë kurse të nivelit të lartë dhe do të pranojë transferimin e krediteve nga kolegje dhe universitete të tjera, duke ndihmuar në uljen e kostove të larta të shkollimit dhe borxhit të studentëve. Revista liberale Washington Monthly e ka lavdëruar kohët e fundit këtë ide.

Një formë e tillë e arsimit në internet, së bashku me programe që diplomojnë nxënësit e shkollave të mesme me një diplomë dyvjeçare kolegji, është një mënyrë e dukshme për të trajnuar më shpejt punëtorë të teknologjisë. Vetëm një sugjerim: ju lutem vendosni dikë tjetër përveç Muskut ose Loomerit në krye të kësaj nisme. /Telegrafi/