Lulzim Kamberi tregon arsyet e dorëheqjes nga Klinika e Kardiologjisë në QKUK

Drejtori i Klinikës së Kardiologjisë në QKUK, Lulzim Kamberi ka dhënë dorëheqje nga kjo pozitë.

Lajmi për dorëheqje është konfirmuar edhe nga vetë QKUK-ja.

“QKUK, ju konfirmon dorëheqjen e drejtorit të Klinikës së Kardiologjisë. Së shpejti do të caktohet ud.drejtori i Klinikës”, thuhej në përgjigjen e tyre.

Kamberi përmes një letre dërguar mediave, ka dhënë arsyet që kanë quar deri tek vendimi për dorëheqje.

“Ju njoftoj se pas periudhës, pak më të gjatë se 3 vite, të drejtimit të Klinikës së Kardiologjisë dorëhiqem nga posti i Drejtorit të Klinikës së Kardiologjisë! Unë kam qëndruar dhe rezistuar ndaj të gjitha përpjekjeve (jo të pakta), organizimeve, mendësive, protestave, peticioneve, të motivuara dhe të incentivuara nga arsye të ndryshme, e që në fund do të përfundonin në pengim serioz të avancimit të Klinikës së Kardiologjisë.

Këtë qëndrim stoik e ndieja si obligim dhe si borxh ndaj gjeneratave të cilat kanë sakrifikuar gjithçka për ne si dhe ndaj gjeneratave të ardhshme!

Tani kur Klinika e Kardiologjisë “lundron” në ujëra më të qeta, do të tërhiqem nga posti i Drejtorit të Klinikës së Kardiologjisë, në vetë përfundimin e mandatit me qëllim të përkushtimit më të lartë në punë profesionale”, ka deklaruar Kamberi.

Ai ka theksuar se “dorëheqja shpresoj të ndikoj në vetëdijësimin e shoqërisë për funksionalizim të mëtejmë”

“Gjatë kësaj kohe u ndesha me shumë veprime institucionale dhe joinstitucionale të cilat duhen ndërruar si: jofunksionalitet i duhur (ligjor etj..), neglizhencë, manipulime, kapje, interpretime të shtrembëruara etj..

Poashtu, disa herë nuk ka qenë në nivelin e duhur edhe mbështetja dhe koordinimi i veprimeve nga strukturat hierarkike, me përjashtime”, ka theksuar Kamberi në letrën dërguar mediave.

Kamberi ka përmendur në edhe disa nga arritjet e Klinikës së Kardiologjisë, siç është bashkimi i klinikës, gjysmëintensiva e Kardiologjisë, themelimi i Elektrofiziologjisë, korrigjimi i defekteve interatriale , mbështetja e qendrës së Kardiologjisë Invazive në Prizren, përkujdes i shtuar në edukimin e kuadrove të reja etj. /Telegrafi/