Kuvendi votoi Qeverinë Kurti 2

Deputeti nga Lista Serbe, Igor Simiq ka thënë se nuk e mbështesin Albin Kurtin për kryeministër, teksa ka paralajmëruar se do të ankohen në Gjykatë Kushtetuese pasi ky i fundit nuk i ka dhënë dy ministri pakicave serbe.

Simiq në seancën ku do të votohet Qeveria Kurti 2, tha se në këtë mënyrë Kurti po ‘u shkel’ të drejtën për dy ministri, të cilat sipas tij, u takojnë nga rezultati i zgjedhjeve të 14 shkurtit. Ai tha se mandatari për kryeministër, Albin Kurti po shkel Kushtetutën e Kosovës.

Për lajmin e plotë klikoni LINKUN. /KP/

Deputeti i Aleancës për Ardhmërinë e Kosovës, Besnik Tahiri, ka thënë se Lëvizja Vetëvendosje dhe mandatari për kryeministër Albin Kurti po shpalos qasje autoritare dhe tentim të dominimit.

“Kjo seancë ka filluar me një rend jo demokratik. Kjo për neve nuk është befasi, pasi fituesi ka zgjedhur procedurën para përmbajtjes. Fituesi ka zgjedhur të veprojë shkurtazi dhe ndaras. Dihet kjo qasje autoritare ku do ta çojë vendin”, tha ai në seancën në të cilën pritet të votohet Qeveria Kurti 2./KP/

Dy deputetët e Kuvendit të Kosovës, që përfaqësojnë komunitetin turk në Kosovë, Fikrim Dmaka dhe Fidan Jilta do ta votojnë Qeverinë Kurti 2.

Kështu ka deklaruar gjatë fjalës së saj në Kuvend, deputetja e partisë turke, Fidan Jilta.

​​​​​​​Në seancën për votimin e Qeverisë Kurti, deputeti i Partisë Demokratike të Kosovës dhe ushtruese i detyrës së kryetarit të kësaj partie, Enver Hoxhaj, tha se në planin qeverisës të prezantuar nga kandidati për kryeministër, Albin Kurti, ka parë më shumë një listë dëshirash se sa plan konkret.

“Edhe qeveria e Hotit dhe ajo Kurtit kanë qenë të paafta dhe ne jemi tash si PDK kemi garuar në këtë zgjedhje me një plan të brendshëm që ta kemi qeverinë kombëtare dhe sa më të përgjegjshme sepse ne besojmë qe një qeveri e fortë do të mund t’i përmbyllte të gjitha sfidat. Më shumë te Kurti e kam parë vetëdijen se sa njeriun, ndërsa sot më shumë e pash njeriun me listë të dëshirave se sa vetëdijen, dhe në atë ekspoze unë nuk pashë plane konkrete se si mund të ndodhë vaksinimi dhe nuk dëgjova një politikë të fortë ekonomike dhe nuk e pashë arsimin si një projekt individual”, tha Hoxhaj.

“Koalicioni mes jush dhe zonjës Osmani është më shumë koalicion për karrige”, tha Hoxhaj.

Dy ministri të Qeverisë Kurti 2 do të drejtohen nga komunitetet në Kosovë, njërën prej të cilave do ta udhëheqë Goran Rakiq nga Lista Serbe.

Kurti propozoi Emilija Rexhepin zëvendëskryeministre e tretë për Pakica dhe të Drejtat e Njeriut, ndërkaq për ministrinë e Pushtetit Lokal propozoi Elbert Krasniqin dhe ministrinë për Komunitete dhe Kthim nga Goran Rakiç.

Kryetari i Lidhjes Demokratike të Kosovës, Lumir Abdixhiku ka adresuar kritika ndaj mandatarit për kryeministër, Albin Kurti.

Në seancën ku pritet të formohet qeveria e re, Abdixhiku i cili është zgjedhur edhe deputet i Kuvendit të Kosovës, ka thënë se Vetëvendosja ka fituar shumicën, po jo të tërën.

Abdixhiku ka thënë se si LDK do të jenë një zë opozitar konstruktiv dhe do të jenë mbrojtës të shtetësisë se Kosovës.

“Kryeministri i ri duhet të kujtojë se nga nesër nuk është kryeministër një partiak, por i gjithë qytetarëve. Kryeministri duhet t’i kujtojë vetes se arroganca e numrave do të shpie edhe më tej në arrogancë numrash”, ka thënë ai.

Mandatari për kryeministër nga radhët e Lëvizjes Vetëvendosje, Albin Kurti ka deklaruar se pa njohjen e realitetit të Kosovës së pavarur dhe pranimin e të vërtetës nga ana e Serbisë, nuk mund të ketë normalizim të marrëdhënieve në mes dy popujve dhe në mes të dy shteteve.

Ai në foltotën e Kuvendit, duke prezantuar ekspozën e tij para të zgjedhurve të popullit, tha se me Serbinë, Kosova ka çështje të hapura që duhet të zgjidhen nëpërmjet dialogut, megjithatë shtoi se asnjë progres nuk mund të bëhet nëse nuk mund të bëhet nëse nuk ka progres në zgjidhjen e fatit të të pagjeturve në Kosovë.

Kurti shtoi se raportet tona fqinjësore do t’i avansojmë nëpërmjet reciorocitetit. Sipas tij, rruga drejt integrimit në BE, mund të jetë sfiduese por ajo nuk ka alternativë.

Dy deputet nga Lista e Vjosa Osmanit kanë marrë pozita në kabinetin e Qeverisë Kurti 2.

Donika Gërvalla është propozuar zëvendësministre e dytë dhe ministre për punë të Jashtme, ndërkaq Faton Peci ministër i Bujqësisë.

Pak para fillimit të seancës së Kuvendit për Votimin e Qeverisë, kandidati për kryeministër, Albin Kurti është parë duke u konsultuar me deputetët Vjosa Osmani e Arben Vitia.

Derisa deputetët po mbledheshin për seancë ai është parë duke folur me Osmanin e Vitinë.

Kryetari i PDK-së, Enver Hoxhaj ka hyrë në sallën e Kuvendit të Kosovës.

Ai është parë në sallë të Kuvendit me disa nga deputetët e partisë së tij.

Ish-nënkryetarja e Kuvendit të Kosovës, Arbërie Nagavci para fillimit të seancës së jashtëzakonshme ka thënë se kanë votat e mjaftueshme për formimin e qeverisë së re, përveç mbështetjes së 58 deputetëve të Lëvizjes Vetëvendosje.

“Ju e pat që edhe për votimit e zotëri Konjufca si kryetar i kuvendit kishim 69 vota. Të gjitha minoritet jo shumicë jo serbe, përveç grupit të LVV- së me 58 deputetë do të mbështesin edhe qeverinë. Besoj që për pak kohë do të kemi edhe një qeveri legjitime”, ka thënë ajo.

Nagavci nuk e ka komentuar votën e Xhavit Halitit të PDK-së për Glauk Konjufcën me rastin e zgjedhjes së këtij të fundit për kryetar të ri të Kuvendit të Kosovës, por tha se i njëjti me kompetencë do të ushtrojë këtë detyrë.

E pyetur se kur do të mbahet seanca për votimin e presidentit, ajo tha se ende nuk dihet se kur ajo mund të mbahet.

“Nuk e di se kur do të mbahet seanca. Ne do të shfrytëzojmë kohën që kemi në dispozicion në mënyre që të mos krijohet asnjë vakum institucional. Sepse e dimë që 5 maji është data e fundit. Aktualisht tani presidenti në detyrë zotëri Konjufca e konsumon afatin kushtetues për të ushtruar detyrën”, ka thënë ajo

Pak minuta para se të fillojë seanca e jashtëzakonshme për formimin e Qeverisë Kurti, në Lëvizjen Vetëvendosje shprehen të bindur se kanë votat e mjaftueshme për zgjedhjen e kabinetit qeveritar.

Krahas kësaj, deputeti Artan Abrashi për KosovaPress u shpreh optimist edhe për zgjedhjen e Vjosa Osmani si presidente.

Për lajmin e plotë klikoni KËTU.

Deputetët e Kuvendit të Kosovës kanë filluar të mblidhen për seancën e votimit të Qeverisë Kurti.

Të parët që janë parë duke shkuar në sallën plenare të legjislativit janë pikërisht deputetët e grupit parlamentar të Lëvizjes Vetëvendosje.

Në seancën për konstituimin e Kuvendit, Glauk Konjufca është zgjedhur kryetar i ri i legjislaturës së tetë. Ai njëherësh ka marrë edhe ushtrimin e detyrës së presidentit nga Vjosa Osmani.

Zëvendëskryeministër pritet të emërohet Besnik Bislimi,

Ministrinë e Punëve të Jashtme pritet ta drejtojë Donika Gërvalla,

Ministrinë e Punëve të Brendshme, Xhelal Sfeçla,

Ministrinë e Arsimit, Arbërie Nagavci,

Ministrinë e Shëndetësisë pritet ta udhëheq Arben Vitia,

Ministrinë e Bujqësisë pritet ta udhëheqë Faton Peci,

Ministrisë e Kulturës Hajrullah Çeku,

Ministrinë e Drejtësisë pritet ta udhëheqë Albulena Haxhiu,

Ministrinë e Financave pritet ta udhëheqë Hekuran Murati,

Ministrinë e Tregtisë pritet ta drejtojë Rozeta Hajdari,

Ministrinë e Mjedisit pritet ta udhëheq Liburn Aliu,

Ministrinë e Pushtetit Lokal, Emilija Rexhepi.

Nuk dihet ende se kush do të jetë ministri i Mbrojtjes, e po ashtu nuk dihet nëse do të ketë Lista Serbe post ministror. /Telegrafi/