Në Lazarat, një fshat të jug të Shqipërisë po zhvillohet një model i ri turizmi. Bëhet fjalë për atë që njihet si turizmi i komunitetit.
Banorë të këtij fshati i janë bashkuar kësaj nisme të veçantë me qëllim promovimin e zonës. Vizitorët që vijnë këtu bëhen pjesë edhe e përditshmërisë së fshatit.
Ata mësojnë për artizanatin, muzikën tradicionale të zonës si dhe produktet e gastronomisë. Një prej eksperiencave më të veçanta është ajo e përpunimit të leshit.
“Po mësoj përpunimin e leshit, që nga qethja, larja, shtirja, terja, lëvrimi…”
Banorët e kanë ruajtur këtë traditë dhe ende realizojnë produkte nga më të ndryshmet. Punimet e artizanatit tërheqin edhe vëmendjen e vizitorëve.
“Ky është art më vete, një art që ishte harruar, i lënë mënjanë”
Ata madje zgjedhin që të ulen në tezgjah dhe të punojnë me fijen e leshit.
Një eksperiencë tjetër tërheqëse është edhe ajo e përpunimit të djathit. Vendasit realizojnë receta të ndryshme të vjetra që kanë si bazë këtë produkt.
E kur ulesh në sofër, nuk ka si të mungojë polifonia. Banorët e trashëgojnë këtë lloj muzike që ruhet si pasuri edhe nga Unesco.
“Tjetër ta dëgjosh, e tjetër ta këndosh, sepse e përjeton ndryshe, sepse kënga labe vërtetë duket se janë mbledhur pesë veta e këndojnë, por në momentin qëarrin dhe futet në të, të merr më vete”.
Qëllimi i kësaj nisme është përfshirja edhe e Lazaratit në hartën turistike për vizitorë vendas e të huaj.
“Lazarati nuk është thjesht ajo ana e errët që njohin të gjithë, është një pjesë që as e mohojmë as e fshehim, por historia nuk mbaron aty. Lazarati ka qenë dhe para asaj pjese dhe vazhdon të jetë. Pra, Lazarati është shembulli i një fshati të transformuar. I një fshati që ka për bazë mikpritjen, që ka për bazë traditen dhe është gati të hapë dyert e të mirëpresë turistë nga e gjithë bota”
Zhvillimi i turizmit të komunitetit në këtë fshat ka ardhur edhe me përkrahjen e organizatës ndërkombëtare Planeterra./Tv klan
