Largimi i nxënëses me autizëm nga shkolla “Elena Gjika” në Prishtinë, Nagavci: Veprim i papranueshëm

Ministrja e Arsimit, Shkencës, Teknologjisë dhe Inovacionit, Arbërie Nagavci ka reaguar sot pas lajmit për largimin e një nxënëseje me autizëm nga shkolla “Elena Gjika” në Prishtinë.

Nagavci thekson se ka autorizuar kolegët përkatës në MASHTI për të analizuar në aspektin profesional rastin, konform situatës dhe gjetjeve do të ndërmarrim të gjitha masat.

Më tej ministrja e Arsimit i ka bërë thirrje Komunës së Prishtinës dhe komunave tjera të cilave u janë alokuar mjetet që të  shpallin konkurset dhe të punësojnë asistentet e të cilët duhet t’i angazhojnë në shkolla.

Lexoni të plotë postimin e ministres:

“Me shqetësim mora informatën për rastin e nxënëses 8 vjeçare, me aftësi të kufizuara , të cilës ju pamundësua vijimi i mësimit në një shkollë të Komunës së Prishtinës.

Arsimi i të gjithë fëmijëve është e drejtë e garantuar me kushtetutë dhe legjislacionin në fuqi, bazuar në instrumentet ndërkombëtare. Çfarëdo veprimi i cili bie në kundërshtim me politikat tona gjithëpërfshirëse, është i papranueshëm dhe nuk do të tolerohet.

Kam autorizuar kolegët përkatës në MASHTI për të analizuar në aspektin profesional rastin, konform situatës dhe gjetjeve do të ndërmarrim të gjitha masat, ashtu që rasti në fjalë të zgjidhet bazuar në interesin me të mirë të fëmijës.

MASHTI në kuadër të sigurimit të mekanizmit të mbështetjes së shkollës dhe fëmijëve me aftësi të kufizuara ka ndarë mjetet dhe buxhetin për punësimin  e asistenteve, Komuna e Prishtinës e ka pasur të lejuar punësimin e 12 asistentëve dhe detyra e tyre ka qenë pikërisht  mbështetja e nxënësve me aftësi të kufizuara që kanë vështirësi në adoptim dhe mësimnxënie. Fatkeqësisht, Komuna e Prishtinës nuk i ka punësuar këta asistentë.

Ne, edhe këtë vit tashmë kemi ndarë mjetet financiare për punësimin e 100 asistenteve dhe Komuna e Prishtinës është një prej komunave që ka pranuar të gjitha informatat për të shpallur konkursin për punësimin e 15 asistentëve, këtë vit.

I bëj thirrje Komunës së Prishtinës dhe komunave tjera të cilave u kemi alokuar mjetet,  që të  shpallin konkurset dhe të punësojnë asistentet, të cilët duhet t’i angazhojnë  në shkolla, për nxënësit  që kanë  nevojë për mbështetje.

Arsimi i çdo fëmije është e drejtë e garantuar dhe realizimi i kësaj të drejte është obligim i të gjithë akterëve dhe shoqërisë sepse vetëm duke kontribuar dhe kryer punën secili nivel, ne do të arrijmë të përmbushim ketë mision.

Si ministri nuk do të ndalemi në punën tonë për ofrimin e mundësive për të gjithë”.

Ndryshe rreth një muaj më parë ishte raportuar për rastin e 8-vjeçares nga Prishtina, së cilës i ishte ndërprerë mësimi në shkollën “Elena Gjika”, pasi sipas drejtorit të shkollës, fëmija ishte autik i theksuar dhe siç tha ai është vështirë që fëmija të rrij në klasë me të tjerët.

Këtë vendim e kishte kundërshtuar familja e fëmijës dhe Qendra e Autizmit. /Telegrafi/