Lamtumirë Ardian Klosi!

Personalitete të jetës publike, politikanë, miq të ngushtë dhe kolegë e të afërm, dy vajzat e tij dhe bashkëshortja Jutta Benzenberg i dhanë lamtumirën e fundit këtë të shtunë publicistit dhe qytetarit të mirë Ardian Klosi, i cili u vetëflijua mesnatën e të enjtes në shtëpinë e tij në Tiranë.

Drejtorit Aurel Plasari, miqtë më të ngushtë të Danit, siç edhe e thërrisnin ata, kanë mbajtur mbi supe arkivolin me trupin e pajetë të publicistit deri në makinën, që do ta dërgonte për në banesën e fundit, raporton agjencia e lajmeve NOA.al.

Mes tyre edhe Kryetari i Partisë Socialiste Edi Rama, mik i vjetër i Ardian Klosit, i cili do të qëndronte në heshtje për minuta të tëra, dhe i përlotur deri në nisjen e makinës së shërbimit funeral përdrejt varrezave të Sharrës.

Rama do të shprehej kështu në rrjetin Twitter për humbjen tragjike të Ardian Klosit: “Ardian Klosi,vdiq për të mos vdekur kurrë. Njerëz të letrave e njerëz të zakonshëm po i japin lamtumirën Danit në Bibliotekën Kombëtare ku miku i tij Aurel Plasari organizoi homazhet. Dani do të dalë nga biblioteka për të shkuar në shtëpinë e fundme në varrezat e Sharrës, ashtu siç vendosi vetë”, shkroi Rama në Twitter.

Gjatë homazheve Drejtori i Bibliotekës Kombëtare Aurel Plasari u shpreh se “kemi humbur një kritik të madh, i cili ka lënë një model unik në Shqipëri”.

Figurën e Klosit e nderuan shumë personalitete të tjerë të politikës, letrave e kulturës.

Homazhe për të nderuar kujtimin e Ardian Klosit zhvilloi edhe Ministri i Kulturës Aldo Bumçi, i cili u shpreh se “humbja e Ardian Klosit ka shkaktuar shumë dhimbje për të gjithë miqtë e të afërmit e tij, por edhe për opinionin publik, që ka humbur një nga zërat intelektualë”.

Ardian Klosi i dha fund jetës së tij duke u vetëflijuar në banesën e tij, një akt që ai e ndërmori për të tretën herë, pas një gjendjeje depresioni që kishte kaluar kohët e fundit.

Publicisti i njohur u shua në moshën 55-vjeçare për t’u prehur përgjithnjë në varrezat e Sharrës. /Telegrafi/